Ukraina prezidenti Vladimir Zelenskiy Polsha bosh vaziri Donald Tusk bilan uchrashuvdan so‘ng bo‘lib o‘tgan matbuot anjumanida AQSH, Xitoy yoki Yevropa Ittifoqi faraziy ravishda Rossiya va Ukraina o‘rtasida vositachi bo‘lishi mumkinligini aytdi.
Ukraina rahbari faqat jiddiy, kuchli ittifoqlar vositachi bo‘lishi mumkinligni ta’kidlagan.
“Sizda Rossiyaga ta’sir qiladigan iqtisodingiz yoki Putin qo‘rqadigan juda kuchli armiyangiz bo‘lishi kerak. Dunyoda bunday davlatlar ko‘pmi? Ko‘p emas. Menimcha, Qo‘shma Shtatlar, Xitoy va Yevropa Ittifoqi shunday mamlakatlardan”, deydi Zelenskiy.
U, shuningdek, Rossiyaga bosim o‘tkazish va Putinni qanday to‘xtatish taklifni yana bir bor eslatgan. Zelenskiyning fikricha, davlatlar barcha sa’y-harakatlarni birlashtirishi kerak.
Ukraina yetakchisi Putin “zaif” davlatlarni hurmat qilmasligini qo‘shimcha qilgan.
Zelenskiy Vengriya bosh vaziri Viktor Orban bilan Kiyevdagi uchrashuvidan keyin Moskvaga borish rejalaridan xabardor emasligini va bu Orbanning “mustaqil tanlovi” ekanini aytgan. Vengriya bosh vaziri Viktor Orban Putin bilan uchrashish uchun 5-iyul kuni Moskvaga tashrif buyurgan edi. Suhbat mavzusi Rossiya—Ukraina urushida sulh o‘rnatish imkoniyati bo‘lgan.
Shundan so‘ng Orban Kiyevga tashrif buyurib, u yerda Vladimir Zelenskiy bilan uchrashgan. Qo‘shma matbuot anjumanida Orban Budapesht Kiyevning tinchlikka erishishga qaratilgan tashabbuslarini qadrlashini, biroq ularni amalga oshirish ko‘p vaqt talab qilishiga ishonishini ta’kidlagan.
“Shunday ekan, men janob prezidentdan (Zelenskiy) o‘t ochishni to‘xtatib, keyin Rossiya bilan muzokaralar olib borishni so‘radim, chunki o‘t ochishni to‘xtatish bu muzokaralar sur’atini tezlashtiradi”, degan edi Orban.
Izoh (0)