Yevrokomissarlar Vengriya raisligiga boykot e’lon qilmoqda

Yevropa komissiyasi Vengriyaning Yevropa Ittifoqiga raisligiga boykot qilmoqda, deya Euronews xabar berdi.

Ma’lum bo‘lishicha, Yevropa komissarlarining hech biri Budapesht tomonidan tashkil etilgan norasmiy uchrashuvlarda qatnashmaydi; ularning o‘rnini quyi mansabdagi shaxslar egallaydi.

Ukrainada o‘t ochishni to‘xtatishga intilayotganini e’lon qilgan Vengriya bosh vaziri Viktor Orbanning Kiyev, Moskva, Pekin va keyinchalik AQSHga tashrif buyurgan safari Bryusselni g‘azablantirgan, deya ta’kidlaydi nashr.

Yevrokomissiya va Yevropa parlamenti Orbanni YI Kengashidagi raisligini suiiste’mol qilgan va Yevropaning xalqaro majburiyatlari va shartnomalarini buzgan, deb hisoblagan. Aksar Yevroparlament deputatlari hatto Vengriyani ovoz berish huquqidan mahrum qiluvchi Yevropa Ittifoqi shartnomasining 7-moddasini amalga oshirishga chaqirgan.

Vengriya Yevropa komissiyasi faoliyatini qayta saylanishga intilayotgan Ursula fon der Lyayyenning siyosiy kampaniyasi deb atagan.

Bu qabul qilib bo‘lmaydigan siyosiy kampaniya, chunki Yevropa Komissiyasining roli Yevropa institutlari o‘rtasida adolatli va do‘stona hamkorlikka asoslanishi kerak. Ular aslida Yevropa institutlarini siyosiy maqsadlarda suiiste’mol qilishga urinmoqda, deydi vengriyalik Yevroparlament deputati Kinga Gal.

Boltiqbo‘yi davlatlari, Polsha, Shvetsiya va Finlyandiya ham Vengriya tomonidan tashkil etilgan yig‘ilishlarga o‘z milliy vazirlarini yubormaslikka qaror qilgan. Avstriya, Garchi Orbanning harakatlarini qoralagan bo‘lsa-da, boykotga qarshi chiqqan.