Будапешт ҳисоб-китобларига кўра, Европа Иттифоқининг 2028—2034 йиллар учун бюджетидаги ҳар бешинчи евро бевосита ёки билвосита Украинага йўналтирилади. Бу ҳақда Венгриянинг Европа ишлари бўйича вазири Янош Бока Deutsche Welle нашрига берган интервьюсида маълум қилган.
Янош Боканинг айтишича, Европа Иттифоқининг янги бюджетидан тахминан 20 фоизини Украина олади. Унинг сўзларига кўра, расмий Будапешт Европа комиссиясининг 2028—2034 йилларга мўлжалланган янги бюджет бўйича таклифини ўрганиб чиқиб, шундай хулосага келган.
“Биз дастлабки таҳлилни ўтказдик ва ушбу таклиф доирасида Украина нафақат Украина жамғармаси маблағларини, балки тўғридан-тўғри ёки билвосита ушбу етти йиллик давр учун Европа Иттифоқи бюджетининг тахминан 20 фоизини олишини аниқладик. Бу бюджетдаги ҳар бешинчи евро бевосита ёки билвосита Украинага йўналтирилишини англатади. Менимча, бу оқилона эмас”, деди у.
Ҳисоб-китоб нимага асосланган?
Венгрия ҳукумати қандай қилиб бундай хулосага келгани ҳақидаги саволга у Украина жамғармасидан 100 миллиард евродан ташқари, Киев Европа тинчлик жамғармасидан фойдаланишини, унинг миқдори икки баравар кўпайиб, 31 миллиард еврога етганини ва “бу маблағларнинг катта қисми Украинага йўналтирилишини” тушунтирган. Мухбирининг Венгрия бу фондни тўхтатиб турганини айтишига жавобан, Бока гап амалиёт ҳақида эмас, балки Еврокомиссия таклифи ҳақида кетаётганини таъкидлаган.
Бундан ташқари, Будапешт ҳисоб-китобларига кўра, мудофаа саноати бюджети беш бараварга оширилган, унинг асосий мақсадларидан бири эса Украина ва Украина мудофаа саноатини қўллаб-қувватлашдир.
“Шунинг учун мен бу маблағларнинг ҳам катта қисми Украинага йўналтирилишини кутмоқдаман. Европа Иттифоқининг Глобал Европа ташқи сиёсат жамғармаси ҳам Украина билан боғлиқ муаммоларни молиялаштириш имконини беради. Қўшимча кредит линиясини яратиш кўзда тутилмоқда, бу аслида Украинани кредитлар орқали молиялаштириш нуқтаи назаридан чексиз имкониятдир”, дейди Янош Бока.
Вазирнинг таъкидлашича, Будапешт ушбу максимал кўрсаткичларни қўшиб, Европа Иттифоқи бюджетининг 2028—2034 йилларга мўлжалланган 1,816 триллион евро миқдоридаги умумий суммасига эътибор қаратган ҳолда фоизларни ҳисоблаган.
Бундан аввал Европа Иттифоқи (ЕИ) комиссияси президенти Урсула фон дер Ляйен Россия—Украина уруши бошланганидан бери Киевга 165 миллиард евро атрофида ёрдам кўрсатилганини маълум қилганди.
Июнь ойида Венгрия бош вазири Виктор Орбан Украинани Европа Иттифоқи ва НАТОга қабул қилиш мумкин эмаслигини, чунки бу Ғарб давлатларининг Россия билан урушга киришишига олиб келишини билдирганди.
Изоҳ (0)