Россияда “дўст бўлмаган” давлатлар таомини таклиф қиладиган овқатланиш муассасаларига солиқ солиш таклиф қилинди. “Россия коммунистлари” партияси тегишли ташаббусни бош вазир Михаил Мишустинга юбормоқчи. Бу ҳақда партия раиси Сергей Малинкович “Абзац” нашрига берган интервьюсида маълум қилди.
Россияга душманлик муносабатида бўлган мамлакатлар ошхонасини тарғиб қилиш нотўғри. Бу мамлакатлар рус ошхонасининг ривожланишига ёрдам бермайди, уларда бундай ресторанлар деярли йўқ, деди Малинкович.
Унинг сўзларига кўра, биринчи навбатда италян, француз, жанубий корея, япон, испан ва немис ошхоналарини “обрўсизлантириш” керак. Озарбайжон ва турк таомлари тайёрланадиган кафеларни солиққа тортиш масаласини ҳам муҳокама қилиш лозим
Хитой ошхонасига тегмаслик керак, улар бизнинг дўстларимиз. Шунингдек, Лотин Америкаси, Вьетнам, белорус, ўзбек, араб ва Шимолий Корея ошхоналарига ҳам. Солиқ масаласига келсак, менимча, поғонали тизим жорий этилиши лозим. Мисол учун, Франция, Германия, Италия бизга фаол қаршилик қилмоқда.
Япония эса узоқ вақтдан бери ҳудудларимизни қўлга киритишни истайди. Шу сабабли, бу давлатлар таомларига қўшимча 12 фоизлик солиқ солиш керак. Қолган давлатларга нисбатан ҳозирча 10 фоиздан бошласа бўлади, дея хулоса қилди сиёсатчи.
Ҳозирда Москва томонидан “дўст бўлмаган” давлатлар рўйхатига 48 та мамлакат киритилган. Улар орасида Словакия ва Венгриядан ташқари Европа Иттифоқи мамлакатлари, шунингдек, АҚШ, Япония, Буюк Британия, Австралия, Украина, Швейцария ва Черногория бор.
Изоҳ (0)