Европа иттифоқининг ташқи ишлар ва хавфсизлик сиёсати бўйича олий вакили Кая Каллас 2028 йилга келиб Россия ЕИ давлатларидан бирига қарши ҳарбий тажовузни бошлаши мумкинлиги ҳақида огоҳлантирди.
“Миллий разведка хизматларимизнинг кўпчилиги бизга Россия 3-5 йил ичида мудофаа тайёргарлигимизни синаб кўриши мумкинлиги тўғрисида маълумот бермоқда”, деди Каллас Брюсселда ўтказилган Европа мудофаа агентлигининг (ЭДА) йиллик анжуманида сўзга чиқиб.
У Кремлнинг эҳтимолий тажовуз режалари тафсилотларини ошкор қилмади. Шу билан бирга, Каллас “Украина Россия босқинига қарши курашаётгани туфайли” Европа вақтдан ютаётганини таъкидлади. Унинг сўзларига кўра, ЕИнинг энг муҳим вазифаси Киевга ҳарбий ёрдам кўрсатишни давом эттиришдир.
“Украинага кўпроқ ёрдам бера олишимизга шубҳа йўқ. Бизнинг ёрдамимиз билан у урушда ғалаба қозониши мумкин”, дея ишонч билдирди у.
Каллас мудофаа харажатларини оширишга чақирди
ЕИ дипломатияси раҳбари иттифоқ мамлакатларини мудофаа соҳасига инвестицияларни кўпайтиришга, шу билан бирга нафақат урушнинг олдини олиш, балки унга тайёргарлик кўриш учун ҳам маблағ сарфлашга чақирди.
Дональд Трамп европаликларнинг мудофаа харажатлари етарли эмас, дея ҳақ гапни айтган, дея таъкидлади у.
Калласнинг сўзларига кўра, ҳозир Москва ҳарбий мақсадларга Брюсселга қараганда деярли беш баравар кўп бюджет маблағларини сарфламоқда: 2024 йилда ЕИ мамлакатларининг мудофаа харажатлари ялпи ички маҳсулотнинг ўртача 1,9 фоизини ташкил этган бўлса, Россияда бу кўрсаткич 9 фоизни ташкил этган.
“Путин фақат кучни тушунади”
“Европанинг ўз ҳарбий салоҳиятига сармоя киритишга қодир эмаслиги ҳам босқинчига хавфли сигнал юбормоқда”, дея қўшимча қилди Каллас.
Унинг сўзларига кўра, Россия президенти Владимир Путин “фақат куч тилида гаплашади”, “заифлик эса уни гиж-гижлайди”.
Сиёсатчи ҳозирда Россияга қарши санкцияларнинг 16-пакети устида иш олиб борилаётганини маълум қилди. Украинани қўллаб-қувватлаш ҳақида сўз юритаркан, Каллас Европа Иттифоқининг ушбу мамлакатга ҳарбий ёрдами ҳозирда деярли 50 миллиард еврога етганини қайд этди. Бундан ташқари, жорий йилнинг февраль ойи охиригача Европа иттифоқи мамлакатларида жами 75 минг украиналик аскар ва зобит ҳарбий тайёргарликдан ўтади.
Изоҳ (0)