Financial Times таҳлилчиларига кўра, Европа Иттифоқида энергия нархининг ошиши ва юқори харажатлар иқтисодиётни рецессияга олиб келиши мумкин. Яқин келажакда бундай оқибатларга йўл қўймаслик учун Европа Марказий банки базавий ставкасини ошириши керак.
Коронавирус оқибатида Европада иқтисодий ўсиш сезиларли даражада секинлашди. Ялпи ички маҳсулот 2021 йилнинг сўнгги чорагида атиги 0,3 фоизга, 2022 йилнинг илк чорагида эса о,2 фоизга ўсди. Бу Россия ва Украина ўртасидаги уруш билан бир вақтга тўғри келди.
Таҳлилчиларнинг фикрига кўра, Европа Иттифоқи давлатлари энергия ташувчиларнинг соф импортчиси сифатида бюджет харажатларини минималлаштириши, ресурсларга талаб ва таклиф ўртасидаги мувозанатни тиклаши керак.
1973 йилда Европада нефть инқирози бўлган эди. Ўша пайтда бир қанча мамлакатлар ставкаларни ошириш ёрдамида инфляция жараёнларини тезда бостира олган.
Буни амалга оширишдан қочган Италия ва Франция узоқ давом этган юқори инфляция билан курашади ва уни енгиб ўтиш учун 80 йиллар бошида янада чуқурроқ иқтисодий таназзулга юз тутади.
9 июнь куни Европа Марказий банки иқтисодий вазиятнинг ёмонлашуви ва инфляциянинг ўсишини кўрсатувчи ҳисоботни эълон қилди.
Регулятор бундай жараёнларнинг асосий сабаби Украинадаги уруш ва унинг оқибатлари, энергия ресурслари ва маҳсулотлари нархининг ошиши, шунингдек, халқаро савдонинг мураккаблашишини кўрсатган.
Аввалроқ Европа иқтисодиёти урушга қарамай, кутилганидан ҳам кўпроқ ўсгани ҳақида хабар берилган эди.
Изоҳ (0)