Катта еттилик давлатлари Украинага 2022 йилги мамлакат бюджетини қоплаш учун 32,7 миллиард доллар ажратди. Бу ҳақда G7 мамлакатлари молия вазирлари қўшма баёнотида маълум қилинди.
«Ҳозирда бу сумманинг ҳаммаси Украинага берилган ёки ўтказиш жараёнида. Ушбу ёрдам билан Украина асосий давлат функцияларини бажаришда давом этди», — дейилади ҳужжат матнида.
G7 давлатларига кўра, юқоридаги сумма ҳарбий, гуманитар ва экспортни қўллаб-қувватлаш учун қўшимча ҳисобланади.
Европа тикланиш ва тараққиёт банки, Халқаро молия корпорацияси ва Европа инвестиция банки Украина ҳукумати, давлат корхоналари ва хусусий секторни қўллаб-қувватлаш учун қўшимча 6,7 миллиард доллар ажратди, дейилади баёнотда.
«2023 йил учун биз Украинага 32 миллиард долларгача бюджет ва иқтисодий ёрдамни сафарбар қилдик. Қўллаб-қувватлашни янада ривожлантиришда давом этамиз», — дейди G7 молия вазирлари.
Ҳужжатга кўра, бу суммага қуйидагилар киради: Европа Иттифоқи томонидан тақдим этилган 18 миллиард доллар, АҚШдан «сезиларли қўллаб-қувватлаш пакети», 500 миллион доллар Жаҳон банки қўшимча кредитлари ва Россия ва Беларусь товарлари бўйича божлардан тушган 115 миллион Канада доллари (тахминан 84 миллион доллар).
20 декабрь куни АҚШ Конгрессига 2023-молия йили учун 1,7 триллион долларлик бюджет лойиҳаси тақдим этилди. Унда Украина ва НАТО иттифоқчиларига ёрдам учун 44,9 миллиард доллар ажратиш назарда тутилган — рекорд кўрсаткич.
Бу маблағнинг 14,5 миллиард доллари Украина Қуролли кучлари учун ҳарбий техникага, 13 миллиард доллари эса иқтисодий ва бюджет ёрдамига йўналтирилади.
Халқаро валюта жамғармаси Украинани қайта тиклаш учун ойига 5 миллиард доллар талаб қилиши мумкин, деб ҳисоблайди.
Украина ҳукумати 2023 йилда бюджет харажатлари даромадлардан икки баравар ошиб кетишини маълум қилган. 25 октябрь куни Украина президенти Владимир Зеленский Европа Иттифоқи раҳбарларидан 2023 йилда 38 миллиард долларлик бюджет камомадини қоплашни сўраган.
Изоҳ (0)