Wizz Air авиакомпанияси геосиёсий ва операцион муаммолар туфайли жорий йил сентябрь ойидан бошлаб Абу-Даби (БАА) шаҳридан барча рейсларни тўхтатишни режалаштирганини маълум қилди. Бу ҳақда Wizz Air авиакомпанияси ўзининг Х сайтидаги саҳифасида хабар берди.
Маълум қилишича, 1 сентябрдан бошлаб Абу-Дабидаги марказидан фаолиятини тўхтатиш тўғрисидаги қарор компаниянинг Марказий ва Шарқий Европадаги асосий бозорларига эътиборини қаратиш мақсадида қабул қилинган.
Шунингдек, асосий сабаблар сифатида иссиқ ҳаво шароитида Pratt & Whitney GTF двигателлари билан боғлиқ муаммоларнинг чўзилиб кетгани, ҳаво бўшлиғининг ёпилиши ва иқтисодий самарадорликнинг йўқлиги ҳам кўрсатилган. Таъкидланишича, буларнинг барчаси 2020 йилда Яқин Шарққа кирган Wizz Air учун жуда арзон бизнес моделини сақлаб қолишни имконсиз қилади.
Компания бош директори Ёжеф Варади ўз баёнотида компания “Яқин Шарқда катта йўлни босиб ўтганини” таъкидлаган. Бироқ, унинг қўшимча қилишича, “фаолият шароитлари сезиларли даражада ўзгарган”.
“Етказиб бериш занжиридаги чекловлар, геосиёсий беқарорлик ва бозорга кириш имкониятининг чекланганлиги дастлабки мақсадларимизни сақлаб қолишни тобора қийинлаштирмоқда”, деди Варади.
Компаниянинг ушбу қарори Ўзбекистон ва БАА ўртасидаги парвозларига ҳам таъсир қилади. Ижтимоий тармоқларда ёзишларича, ушбу йўналишда сентябрдан чипталар кўрсатмаяпти.
Wizz Air — Венгриянинг лоукостер авиакомпанияси бўлиб, штаб-квартираси Будапештда жойлашган. Wizz Air 2022 йил декабрь ойидан Абу Дабидан Самарқандга, январь ойидан эса Абу Даби—Тошкент—Абу Даби йўналиши бўйича мунтазам рейсларни амалга оширмоқда.
2024 йил апрелида Wizz Air Европа пойтахтлари ва Ўзбекистон шаҳарлари ўртасида тўғридан тўғри рейсларни йўлга қўйишдан манфаатдорлиги маълум қилинганди.
Изоҳ (0)