Лондоннинг “Челси” клуби футбол тарихида мисли кўрилмаган ютуққа эришди. Stata Football нашрининг ёзишича, “аристократлар” барча йирик клублараро мусобақаларда ғолибликни қўлга киритган илк жамоага айланди.
Аввалроқ лондонликлар Англия Премер Лигаси, Англия Кубоги, Лига Кубоги, УЕФА Чемпионлар Лигаси, Европа Лигаси ва Конференциялар Лигасида зафар қучган эди. Энди эса ушбу рўйхатга Клублар ўртасидаги Жаҳон чемпионлиги ҳам қўшилди.
Маълумот учун, “Челси” 2021 йилда ҳам мундиалда ғалаба қозонган, бироқ 2025 йилги турнир илк бор янгича форматда – 32 та клуб иштирокида ўтказилди. Лондон клуби шу тариқа янги форматдаги Жаҳон чемпионатининг илк ғолибига айланди.
Маълумот учун, мазкур баҳс 13 июлдан 14 июлга ўтар кечаси АҚШдаги “MetLife” стадионида бўлиб ўтди. Унда “Челси” “ПСЖ”ни 3:0 ҳисобида мағлуб этиб, бош совринга эга чиқди.
Учрашувда ҳисоб 22-дақиқада Коул Палмер томонидан очилди. 30-дақиқада Палмер яна бир марта рақиб дарвозасига йўл топиб, ўзининг дублини нишонлади. Танаффусга яқин – 43-дақиқада эса Жоао Педро Палмернинг ажойиб пасидан кейин учинчи голни урди ҳамда ўйин тақдирини ҳал қилди.
Изоҳ (0)