Россия президенти Владимир Путин 3 июль куни америкалик ҳамкасби Дональд Трамп билан бўлган сўнгги телефон суҳбатида Украинага йирик ҳужум бошлашидан огоҳлантирган. Бу ҳақда манбаларга таяниб, Axios хабар берди.
Манбаларга кўра, Путин келгуси 60 кун ичида Украинанинг қисман босиб олинган ҳудудларини тўлиқ эгаллаш учун йирик ҳужумга ўтишини айтган. Шундан сўнг Трамп франциялик ҳамкасби Эммануэл Макрон билан суҳбатлашган. Мулоқотда Путин Украинанинг Луганск, Донецк, Запорожье ва Херсон вилоятлари маъмурий чегаралари доирасида “ҳамма нарсани эгаллаб олишни хоҳлаётгани” таъкидланган.
Путин билан мулоқот асосида Трамп у жанговар ҳаракатларни тўхтатиш ниятида эмаслигига ишонган. Бу АҚШ президентининг Украинага ҳарбий ёрдам юбориш қарорига таъсир кўрсатган. Жумладан, сиёсатчи Украинага Patriot ракеталарини юборишини таъкидлаган.
Биз уларга жуда зарур бўлган Patriot’ларни юборамиз, чунки Путин ҳақиқатан ҳам кўпчиликни ҳайратда қолдирди. У яхши гапиради-ю, кечқурун ҳаммани бомбардимон қилади...Биз уларга турли хилдаги жуда мураккаб ҳарбий техникаларни жўнатмоқчимиз. Улар бунинг учун бизга 100 фоиз ҳақ тўлайди ва биз айнан шуни хоҳлаймиз, деган Трамп.
АҚШ президенти Киевга юбориладиган қуроллар учун тўловни Европа Иттифоқи амалга оширишини айтган. У Украинага қурол-яроғ етказиб беришнинг янги режасини бугун эълон қилиши кутилмоқда. Ҳарбий ёрдам таркибига узоқ масофали ракеталар ҳам кириши мумкин.
Трамп ҳақиқатан ҳам Путиндан ғазабланган. Унинг 14 июль кунги баёноти жуда кескин бўлади, деди Жанубий Каролинадан республикачи сенатор Линдси Грем.
Путин жангларда қисқа танаффусларга рози бўлган бўлса-да, АҚШнинг шартсиз 30 кунлик ўт очишни тўхтатиш бўйича таклифларини рад этган. Россия бу таклиф Киевга ўз қўшинларини сафарбар қилиш ва қайта қуролланиш имкониятини беришини билдирган. Трамп Россия президенти урушни тўхтатиш бўйича музокаралардан бош тортганидан “ҳафсаласи пир бўлгани”ни айтган.
Изоҳ (0)