Украина президентининг маслаҳатчиси Олег Устенконинг Financial Times нашрига айтишича, мамлакатга бюджет тақчиллигини қоплаш учун ойлик 9 млрд доллар молиявий ёрдам керак.
Унинг сўзларига кўра, иттифоқчиларнинг етарли кўмагисиз Украинанинг омон қолиши «деярли имконсиз» бўлади. Аввалроқ Киев ўз эҳтиёжларини 5 млрд долларга баҳолаган эди.
«Яқин ойларда биз ҳар ойда 5 млрд доллар ўрнига 9 млрд доллар олишимиз керак. Биз ҳар қандай ҳолатда ҳам омон қолишга ҳаракат қиламиз, аммо иттифоқчиларимизнинг молиявий ёрдамисиз бу нафақат қийин, балки деярли имконсиз ҳам бўлади», — деди Устенко.
Июнь ойи охирида Украина президенти Владимир Зеленский Украина томонига бюджет тақчиллигини қоплаш учун ойига 5 млрд доллар ёрдам кераклигини айтганди.
Кеча, 12 июль куни Европа Иттифоқи Украинага 1 млрд евро миқдорида кредит ажратишни маъқуллади.
Украина бош вазири Денис Шмигал ҳам мамлакат икки ҳафта ичида АҚШдан 3 млрд доллар олгани ҳақида маълум қилди.
Аввалроқ Германия Украинага 9 млрд евролик ёрдам пакети тақдим этилишига тўсқинлик қилаётгани ҳақида хабар берилган эди.
Изоҳ (0)