Украина иқтисодиётида 2022 йилда бошланган урушдан кейин илк бор Россияга қараганда нисбатан барқарор ҳолат кузатилди. Бу ҳақда The Economist хабар берди.
Россияда рублнинг қадрсизланишини тўхтатиш учун эса ставкалар яқин келажакда 23 фоизгача кўтарилиши лозим, ЯИМ эса 2025 йилда бор-йўғи 0,5-1,5 фоизга ўсиши кутилмоқда.
Шунга қарамай, Украина жиддий таҳдидларга дуч келмоқда: урушнинг кучайиши, ички ресурсларнинг қисқариши ва АҚШнинг сайланган президенти Дональд Трампнинг таъсири, деб ёзади The Economist.
2023 йилда Россия “ғалла шартномаси”ни узайтиришдан бош тортганидан сўнг, Украина дрон ва ракеталар билан хавфсизликни таъминлаган ҳолда ўзининг денгиз йўлагини очди.
Бу нафақат дон, балки мамлакатнинг иккинчи муҳим экспорти бўлган металл ва минераллар етказиб беришни қайта тикласҳ имконини берди. Бу ва Ғарб ёрдами туфайли Украина курашни давом эттириш имкониятига эга бўлди, дейилади хабарда.
Бироқ ҳозир янги босқич бошланмоқда, бу даврда иқтисодиёт энг катта муаммоларга: энергия, инсон ва молиявий ресурсларнинг кескин танқислигига дуч келмоқда.
Доимий таъмирлаш ишларига қарамай, мамлакат урушдан олдинги 36 ГВт ишлаб чиқариш қувватининг ярмидан камроғидан фойдаланиши мумкин. Сўнгги пайтларда Россиянинг ҳужумлари яна авж олди. Шунга қарамасдан, мақолада таъкидланишича, мамлакат бундай тўқнашувларга яхшироқ тайёрланиб қолган. Декабрь ойида Украина Европа иттифоқидан электр энергияси импорт қилиш қувватини деярли чорак қисмга ошириб, 2,1 ГВт га етказди.
Иккинчи ва энг долзарб муаммо — ишчи кучи етишмаслиги. 2022 йилдан бошлаб сафарбарлик, миграция ва уруш туфайли ишчи кучи бешдан бир қисмдан кўпроққа, яъни 13 миллион кишига қисқарди.
Яна бир муаммо — маблағ танқислиги. Кичик фермер хўжаликлари ва корхоналар ўз фаолиятини молиялаштириш учун етарли миқдорда қарз олиши қийин. Узоқ муддатли сармоя киритиш деярли имконсиз.
The Economist таъкидлашича, давлат бюджетга тушумлардан кўпроқ маблағ сарфламоқда. 2025 йилда унинг бюджет тақчиллиги ЯИМнинг тахминан 20 фоизини ташкил этиши кутилмоқда. Тўғри, бу тақчилликнинг деярли барчаси — 38 миллиард доллар — ташқи манбалар ҳисобидан молиялаштирилади.
Изоҳ (0)