Европа комиссияси ва Украина Киевга 500 миллион евро миқдорида ёрдам кўрсатиш бўйича келишув имзолади. Бу ҳақда Еврокомиссия расмий вакили Эрик Мамерга таяниб, «ТАСС» хабар бермоқда.
Европа Комиссияси ва Украина бугун (5 сентябрь) куни, апрель ойида Украинани қўллаб-қувватлаш кампанияси ва май ойида Варшавада бўлиб ўтган юқори даражадаги халқаро донорлар конференцияси доирасида, президент Вон дер Леен томонидан қабул қилинган мажбуриятларнинг бир қисми сифатида 500 миллион евро миқдоридаги бюджет маблағини қўллаб-қувватлаш бўйича янги дастурни имзолади.
Қайд этилишича, ушбу маблағлар таълим, қишлоқ хўжалиги эҳтиёжлари ва уй-жойларни таъмирлашга йўналтирилади.
Еврокомиссия июнь ойи охирида Украинага йил охиригача 9 миллиард евро миқдорида ёрдам ажратиш тўғрисидаги қарорини эълон қилганди. Бироқ ҳозирча бу маблағнинг атиги 1 миллиард евросини Киевга ўтказишга муваффақ бўлди.
Аввалроқ Украина президенти Владимир Зеленский офиси раҳбари ўринбосари Игорь Жовква, Германияни 9 миллиард евро миқдоридаги макромолиявий ёрдамни тўсиб қўйганликда айблаган эди. Унинг сўзларига кўра, Украина аллақачон 1 миллиард евро ёрдам олган. Аммо Германия ва бошқа баъзи Европа давлатлари қолган 8 миллиард еврони беришни кечиктирмоқда.
Изоҳ (0)