Ўзбекистонда жорий йил 30 июнгача 40 105 гектарда 37 миллион 281 минг дона мевали дарахт кўчати экилди. Бу ҳақда Ўсимликлар карантини ва ҳимояси агентлиги Ахборот хизмати раҳбари Сабина Садинова маълум қилди.
Шунингдек, 10 июль ҳолатига дала четлари, каналлар, суғориш ва коллектор-дренаж тармоқлари атрофида 39 минг гектар майдонга қишлоқ хўжалиги экинлари уруғлари экилди.
Таҳлилларга кўра, 3-4 йилдан сўнг дала четлари, каналлар, суғориш ва коллектор-дренаж тармоқлари атрофидаги майдонлардаги мевали дарахтлардан йилига ўртача экспортбоп 280 минг тонна ҳосил олиниб, қуритилган ва музлатилган ҳолда 70 минг тонна маҳсулот экспортини амалга ошириш мумкин.
Шунингдек, 40 мингдан ортиқ фермер ва деҳқон хўжалиги ҳамда салкам 32 минг нафар аҳоли томорқа эгалари иштирокида 3,5 мингдан ортиқ семинар-тренинглар ўтказилиб, қарор мазмун-моҳияти, маҳсулот етиштирувчилар кооперацияларини шакллантириш, Европа давлатларига қуритилган шафтоли, олма, ўрик ва бошқа данакли мевалар экспортида Арманистон тажрибаси ўргатилди.
Карантин агентлигининг 2 291 нафар ходими 8 498 та маҳаллада ҳамда 866 та тадбиркорлик субъекти етиштирилган маҳсулотларни кафолатли харид қилиш учун бириктирилди.
Экологик рейдлар
2023—2024 йиллар ва 2025 йилнинг 5 ойи давомида ҳуқуқни муҳофаза қилиш органлари билан биргаликда 3500 дан ортиқ рейд тадбирлари амалга оширилди. 250 мингдан ортиқ корхона ва фуқароларга соҳага оид профилактика тадбирлари ўтказилди. Шундан соҳага оид қонунчилик талабларини бузган 110 941 нафар шахс аниқланиб, уларга 115 млрд сўм маъмурий жарималар белгиланди ва 32 млрд сўм табиатга етказилган зарарлар бўйича даъво қўзғатилди, шундан жами 66 млрд сўм маблағ ундириб олинди.
Жумладан, сўнгги уч йилда 982 млрд сўмлик 429 та жиноий иш ҳужжатлари (шундан 2023 йилда 171 та, 2024 йилда 172 та ва 2025 йилнинг биринчи чорагида 86 та) прокуратура органларига қонуний чора кўриш мақсадида тақдим этилган бўлиб, шундан 275 та ҳолатда ҳуқуқбузарларга жиноий иши қўзғатилган.
Изоҳ (0)