Россия президенти Владимир Путин ўз шартлари асосида тинчликка эришмагунча Украинадаги урушни давом эттиради. Бу ҳақда Кремлдаги учта манбага таяниб Reuters хабар берди.
АҚШ президенти Дональд Трамп 14 июль куни Украинадаги урушни тугатиш учун Россияга 50 кун муҳлат берган эди. Манбалар Путин мазкур талабни эътиборга олмаслигини айтмоқда. Бундан ташқари, рус қўшинлари олдинга силжиши билан Путиннинг ҳудудий талаблари кенгайиши эҳтимоли мавжуд.
Россия президенти мамлакат иқтисодиёти ва армияси Ғарбнинг навбатдаги санкцияларига бардош бера оладиган даражада кучли эканига ишонади. Шу боис у Россиянинг келажакдаги иқтисодий қийинчиликларни, жумладан, АҚШ томонидан Россия нефтини харид қилувчиларга бож жорий этилиши каби чораларни ҳам енгиб ўтишига ишонади.
Путиннинг фикрига кўра, ҳеч ким, шу жумладан, америкаликлар ҳам у билан Украинада тинчлик ўрнатиш тафсилотларини жиддий муҳокама қилмаган. Шунинг учун у музокараларни ўзи истаган натижага эришмагунча давом эттиришни мақсад қилган, деди Reuters манбаларидан бири.
Путин НАТОнинг шарққа кенгаймаслигини, Украинанинг бетараф мақомини, русийзабон аҳоли ҳуқуқлари ҳимоя қилинишини ва Украинанинг аннексия қилинган бешта ҳудуди Россияники деб тан олинишини талаб қилмоқда. Шу билан бирга, “у Украина хавфсизлиги кафолатларини муҳокама қилишга тайёр”, дейилади хабарда.
Трампнинг ультиматуми ва Москванинг муносабати
АҚШ президенти 14 июль куни Путиннинг Украинада ўт очишни тўхтатиш бўйича келишувга эришишдан бош тортганидан ҳафсаласи пир бўлганини айтди. У Россияга Украина бўйича келишув тузиш учун 50 кун вақт беришини айтди. Агар 50 кун ичида Украина билан тинчлик келишувига эришилмаса, АҚШ Россиянинг қолган савдо ҳамкорларига нисбатан 100 фоизлик иккиламчи божлар жорий этади.
Бундан ташқари, яқин келажакда Европа давлатлари билан биргаликда Украинага ҳаво ҳужумидан мудофаа тизимлари, жумладан, Патриот қурилмалари, катта миқдордаги қурол-яроғ ва бошқа ҳарбий техника етказиб бериш режалаштирилган.
Россия президенти матбуот котиби Дмитрий Песков Трампнинг баёнотларига изоҳ бериб, улар “жуда жиддий” эканини таъкидлади. У Россия президенти америкалик ҳамкасбининг сўзларига “агар ва қачон зарур деб ҳисобласа” изоҳ беришини айтди.
Россия Хавфсизлик кенгаши раис ўринбосари Дмитрий Медведев эса мазкур талабга жавоб қайтарди. У Трампнинг “декоратив ультиматуми” Россияга аҳамиятсиз эканини билдирди.
Изоҳ (0)