Ўзбекистон терма жамоаси аъзоси Аббосбек Файзуллаевнинг Москвадаги “ЦСКА” клубидан Истанбулнинг “Башакшеҳир” жамоасига ўтиши оддий трансфер эмас, балки City Football Group (CFG) томонидан стратегик асосда амалга оширилган қарор сифатида кўрилмоқда.
“Манчестер Сити” скаутлари айнан Файзуллаевни “Башакшеҳир”га тавсия қилган. Ушбу трансфер “Башакшеҳир” жамоасининг City Football Group таркибига қўшилганидан сўнг рўй бермоқда. Эндиликда “Башакшеҳир” ҳам CFG тизимидаги клуб сифатида ҳолдинг брендини Туркия орқали янги бозорларга олиб чиқишда воситачи бўлиб хизмат қилади.
Трансфер ортида ётган омиллар
Аббоснинг “ЦСКА”дан кетиши ва “Башакшеҳир”га ўтиши ортида бир қанча сабаблар бор:
- Файзуллаевнинг “ЦСКА” билан шартномаси 2026 йилда якунланади, шунинг учун москваликлар уни юқори нархда сотишга уринмоқда;
- Россия клубларининг Европа орқали пул тушумларини олишдаги муаммолари;
- Туркия-Россия банк тизимлари орқали тўловларни амалга ошириш имконияти;
- Ўзбекистон ва Туркия ўртасидаги маданий яқинлик;
- Файзуллаевнинг City Football Group брендининг Марказий Осиёдаги юзига айланиши эҳтимоли.
- Ҳусановдан кейин марказий Осиё минтақаси бозорига кириш
Марказий Осиё бозорига кириш
2025 йилги қишки трансферлар ойнасида ўзбекистонлик ҳимоячи Абдуқодир Ҳусанов 40 миллион евро эвазига “Манчестер Сити”га ўтганди. Ушбу трансфердан сўнг, City Football Group таркибидаги “шаҳарликлар”нинг мухлислари сони бир неча миллион нафарга кўпайди. Бу мухлисларнинг аксарияти Ўзбекистон ҳамда Марказий Осиёнинг бошқа давлатларига мансуб.
Ушбу жараён фонида City Football Group Марказий Осиё футбол бозорига чуқурроқ киришни мақсад қилмоқда. Бунинг учун “Башакшеҳир” клуби “коридор” вазифасини бажариши мумкин.
Яқинда Марказий Олимпия қўмитаси раисининг биринчи ўринбосари Отабек Умаров CFG таркибидаги жамоалардан бирида яна бир ўзбекистонлик футболчининг пайдо бўлиши эҳтимоли борлигини маълум қилган эди. Эҳтимол, бу футболчи айнан Аббосбек Файзуллаев бўлиши мумкин.
Шунингдек, ушбу ҳолдинг Ўзбекистон Суперлигасида иштирок этаётган жамоалардан бирини таркибига қўшиб олиш устида ҳам ўйламоқда. Миш-мишларга кўра, CFG Фарғонанинг “Қўқон-1912” клубини харид қилиш эҳтимолини кўриб чиқмоқда. Файзуллаев эса бу жараёнда биринчи “элчи” сифатида баҳоланмоқда.
Аббосбек Файзуллаевнинг “Башакшеҳир”га ўтиши — оддий клуб алмаштириш эмас, балки City Football Group’нинг глобал стратегиясига асосланган, Марказий Осиё футболини интеграциялаш йўлидаги муҳим қадамлардан биридир.
Эҳтимол, Файзуллаев бу тизимга ўтган биринчи марказий осиёлик футболчи эмас, лекин у сўнггиси бўлмаслиги аниқ.
Изоҳ (0)