Yevropa Ittifoqi (YI) komissiyasi prezidenti Ursula fon der Lyayen Rossiya—Ukraina urushi boshlanganidan beri Kiyevga 165 milliard yevro atrofida yordam ko‘rsatilganini ma’lum qildi. Bu haqda Anadolu xabar berdi.
Yevrokomissiya rahbari Rimda Italiya va Ukraina hukumatlari tomonidan birgalikda tashkil etilgan “Ukrainani tiklash” konferensiyasida nutq so‘zlagan. U Rossiya—Ukraina urushi boshlanganidan beri Yevropa Kiyevning eng yirik donori bo‘lib kelayotganini ta’kidlagan.
“Biz 2025-yilda Ukrainaga ittifoq tashqi moliyaviy yordamining 84 foizini taqdim etdik. Ushbu harakatlar doirasida men Kiyevga 1 milliard yevrolik makromoliyaviy qo‘llab-quvvatlash to‘lovidan tashqari Ukraina jamg‘armasidan yana 3 milliard yevrodan ortiq yordam berilishini ma’lum qilaman”, degan Ursula fon der Lyayen.
Ushbu konferensiyada imzolangan kafolatlar va grantlar Ukrainani rivojlantirish va qayta tiklash uchun 10 milliard yevro atrofida sarmoya kiritishga yo‘l ochishi ta’kidlangan.
“Ukraina bilan yangi hamkorlik xususiy sektorda investitsiyalarni ko‘paytirishda ham muhim rol o‘ynaydi. Bu tiklanish uchun juda muhim. Bugun Italiya, Germaniya, Fransiya, Polsha va Yevropa investitsiya banki bilan Ukrainani tiklash bo‘yicha yangi jamg‘arma ishga tushirildi. U energetika, transport, muhim xomashyo va ikki maqsadli sanoat tarmoqlariga investitsiya kiritadi”, deb qo‘shimcha qilgan siyosatchi.
2,3 milliard yevro yordam
YI 10-iyul kuni xalqaro va davlat moliya institutlari orqali Ukrainani qayta qurish bo‘yicha sa’y-harakatlarni qo‘llab-quvvatlash uchun 2,3 milliard yevrolik yangi kelishuvlar paketini imzolaganini e’lon qilgan.
Bayonotda aytilishicha, Ukraina investitsiya dasturi doirasidagi yangi kelishuvlar to‘plami 1,8 milliard yevro kredit kafolatlari va 580 million yevro grantlarni o‘z ichiga oladi. Ushbu paket Ukrainaga 10 milliard yevrogacha sarmoya kiritishga imkon beradi.
Hujjatga ko‘ra, Ukrainada
- kichik biznesni qo‘llab-quvvatlash uchun 500 million yevro;
- energetika, transport va ishlab chiqarish kabi asosiy tarmoqlardagi yirik xususiy sektor loyihalari uchun 600 million yevro;
- kommunal infratuzilma uchun 520 million yevro,
- energetika tizimini barqarorlashtirish va qayta tiklanadigan energiya manbalari quvvatini oshirish uchun 265 million yevro,
- muhim infratuzilmani ta’mirlash va rekonstruksiya qilish uchun 310 million yevro miqdorida kafolat va grantlar taqdim etiladi.
Izoh (0)