Украина Қуролли кучларининг фронтдаги ҳолати тобора оғирлашмоқда ва кузга бориб янада кескинлашиши мумкин. Бу ҳақда Financial Times нашрининг халқаро алоқалар бўлими бош шарҳловчиси Гидеон Рахман маълум қилди.
Унинг таъкидлашича, Россия ҳам, Украина ҳам деярли ҳолдан тойган. Бироқ Россия амалдаги ҳарбий ҳаракатлар суръатини яна бир йил давом эттира олса, Украина етарли ҳарбий ёрдамсиз атиги ярим йил ичида мудофаа имкониятларини йўқотиши мумкин.
АҚШдан фарқли равишда, Европада Россиянинг ўт очишни тўхтатишга тайёрлигига ишонувчилар деярли қолмаган. Муҳим маълумотларга эга юқори мартабали бир расмийга кўра, Россиянинг асосий мақсади ҳозирда Одессани эгаллаш бўлиб қолмоқда. Президент Владимир Путин бу шаҳарни “тарихан рус шаҳри” деб билади. Март ойида Россиянинг Одесса бўйича даъволарини Путиннинг ўзи тилга олган, апрель ойида эса бу ҳақда унинг ёрдамчиси Николай Патрушев баёнот берган.
Киевдаги сиёсий кайфият ҳам ўзгариб бормоқда
Ёпиқ учрашувларда улар Ғарб иттифоқчиларидан Россияга босим ўтказиш ва сулҳга эришиш зарурлигини тобора қатъийроқ талаб қилмоқда. Рахманнинг таъкидлашича, бир-икки йил олдин бундай гаплар Киев учун таслим бўлиш сифатида баҳоланган бўларди.
Шунга ўхшаш кузатувлар Европанинг собиқ сиёсатчилари томонидан ҳам билдирилган. Улар орасида Польша собиқ президенти Александр Квасневскй, Швеция собиқ бош вазири Карл Билдт, Финляндия собиқ бош вазири Санна Марин ва Нидерландия мудофаа вазири Кайса Оллонгрен ҳам бор. Улар ўтган ҳафта Киевга ташриф буюрган эди.
Расмийлар, мутахассислар ва ҳарбий раҳбарлар билан ўтказилган учрашувлардан чиққан хулосамиз шуки: агар ҳозир қатъий чоралар кўрилмаса, Европа жиддий хавф остида қолади. Украиналиклар қаршилик кўрсатишни ҳеч қачон тўхтатмайди, бироқ етарли ҳарбий ёрдам бўлмаса, Украина яна кўпроқ ҳудудлардан айрилиши мумкин. Янги шаҳарлар босиб олиниши эҳтимоли бор. Бу эса 500 миллиондан ортиқ европалик фуқаролар хавфсизлигини таҳдид остига қўяди, деган улар.
Сиёсатчилар фикрича, Европа зудлик билан Украинага қурол-яроғ сотиб олиш учун маблағ ажратиши керак. Бу ёрдам эвазига Украина саноати қурол ишлаб чиқариш ҳажмини ошириб, армияни таъминлай олади. Уларнинг ҳисоб-китобига кўра, қувватларни тўлиқ ишга тушириш учун 10–15 миллиард доллар талаб этилади.
Ушбу молиявий ёрдам Россиянинг 2025 йилда катта ютуқларга эришишига халақит бериши мумкин. Гарчи айрим илғор қуроллар фақат АҚШда мавжуд бўлса-да, Украинадаги ишлаб чиқариш муҳим эҳтиёжларнинг кўпини қоплашга қодир. Биз, европаликлар, ҳатто АҚШ Украинага пул ва қурол беришни тўхтаца ҳам, буни ўзимиз уддалай оламиз, деган улар.
Украина Қуролли кучлари бош қўмондони Александр Сирскийга кўра, сўнгги бир йил ичида фронт чизиғи 160 километрга кенгайиб, ҳозирда 1200 километрдан ошган.
Украина дронлари Россиянинг ҳужумини тўхтатиши мумкин
Баъзи Ғарб экспертлари Украина ҳарбий таъминотнинг қисқариши ва ўсиб бораётган йўқотишларга қарамай, келгуси йил давомида фронт чизиғини ушлаб тура олишига ишонади. Уларнинг фикрича, бунда украиналикларга дронлардан фойдаланиш тажрибаси ва Россия томонида механизациялашган дивизияларнинг етишмаслиги ёрдам бериши мумкин.
Изоҳ (0)