Германия канцлери Фридрих Мерс Россия уруш сабабли Украинага етказилган зарарни қоплаши шартлигини айтди. Бу ҳақда у Римда Украинани тиклаш бўйича конференция доирасида маълум қилди.
Берлиннинг ҳисоб-китобларига кўра, етказилган зарар миқдори тахминан 500 миллиард еврони ташкил этади.
Россия бу моддий зарарни қоплаши керак. Бу амалга ошмагунча, у музлатилган Россия активларига кира олмайди ва кириши мумкин эмас, дея таъкидлади Мерс.
Россиянинг юзлаб миллиард еврога тенг давлат активлари, асосан Европа Иттифоқи мамлакатларида музлатилган. Канцлернинг айтишича, бу активлардан тушаётган даромадлар ҳозирда ҳам Украина кредитларини таъминлаш учун йўналтирилмоқда.
Мерс, шунингдек, Украинани тиклаш хусусий сектор ва халқаро ҳамкорликсиз мумкин эмаслигини таъкидлади. Унинг фикрича, бу нафақат Украина, балки Германиянинг ўзи учун ҳам манфаатли:
Бу умумий сиёсий тартибимиз, Европадаги эркинлик, бозорлар эркинлиги, иқтисодий ўсиш ва энергетика хавфсизлигимиз учун зарурдир, деди у.
2024 йилда G7 мамлакатлари Россиянинг музлатилган активларидан тушган даромадларни Украинани қўллаб-қувватлашга йўналтиришга келишиб олди. Бу маблағлар Киевга берилган 50 миллиард долларлик кредитни сўндиришга ҳам сарфланади.
Украинани тиклашга қанча маблағ кетади?
Украина бош вазири Денис Шмигал уч йилдан ортиқ давом этган урушдан кейин тиклаш харажатларини 14 йил давомида 850 миллиард еврога баҳолади.
Бизнинг концепциямиз умумий ҳажми бир триллион АҚШ доллари бўлган иккита жамғарма ташкил этишни назарда тутади, деган Шмигал.
Биринчи жамғарма Киев назоратида бўлган “Украина жамғармаси” бўлади. У хорижда мусодара қилинган 460 миллиард евродан ортиқ Россия активлари, шунингдек, Россия хом ашёси экспортига қўйиладиган махсус солиқ ҳисобидан молиялаштирилиши режалаштирилган.
Қарийб 400 миллиард евролик иккинчи жамғарма хусусий инвестициялар ҳисобидан шакллантирилади. Шмигал, шунингдек, иттифоқчиларни 2026 ва 2027 йилларда Украина бюджети тақчиллигини қоплаш учун қўшимча молиявий маблағ ажратишга чақирган.
Изоҳ (0)