Киев Жаҳон банкининг иккита дастури доирасида Токиодан 118 миллион доллар олди. Бу ҳақда Украина Молия вазирлиги сайтида хабар берилди.
Украина давлат бюджетига Жаҳон банкининг “Соғлиқни сақлаш тизимини мустаҳкамлаш ва ҳаётни асраш” (Heal Ukraine) ва “Ҳуқуқ ва имкониятларни тиклаш учун уй-жойларни реконструкция қилиш” лойиҳалари доирасида Япония ҳукуматидан қайтарилмайдиган асосда 118 миллион доллар тушди, —дейилади баёнотда.
Аввалроқ Украина бош вазири Денис Шмигал Киев Жаҳон банки дастури доирасида Токиодан 984 миллион доллар олганини маълум қилган эди.
Украинада 2024 йил 43,9 миллиард долларлик рекорд даражадаги бюджет камомади режалаштирилган. Мамлакат ҳукумати унинг катта қисмини Ғарб иттифоқчилари ёрдамида қоплашни кутмоқда.
Айни пайтда АҚШ Конгрессида Украинага ёрдам кўрсатиш масаласини ҳал қилиш тўрт ойдан кўпроқ вақтга кечиктирилди. 2023 йил декабрида бўлиб ўтган саммитда Европа Иттифоқи давлатлари ҳам Киевга тўрт йилга мўлжалланган 50 миллиард евро миқдоридаги молиявий ёрдам дастурини қабул қила олмай, уни фақат 1 февралдаги фавқулодда саммитда маъқуллаган эди.
Изоҳ (0)