Қозоғистоннинг БААдаги элчихонаси собиқ маслаҳатчиси Сакен Мамаш хотинига нисбатан мунтазам равишда оилавий зўравонлик қилганликда айбланиб, олти йил муддатга озодликдан маҳрум қилинди. Бу ҳақда “Казинформ” агентлиги хабар бермоқда.
Суд маълумотларига кўра, ҳозирда собиқ дипломат вақтинча ишсиз, шунингдек, никоҳдан ажрашган. У хотинини қийноққа солишда айбдор деб топилиш билан бирга дипломатик унвонидан ҳам маҳрум қилинган.
Ўтган йили Қозоғистоннинг “Не молчи.kz” жамоат фонди дипломат Сакен Мамашнинг рафиқаси Карина Мамашнинг мурожаатини эълон қилди. Аёлнинг сўзларига кўра, эри уни 10 йил давомида зўрлаган ва калтаклаган.
Остона суди матбуот хизмати Сакен Мамашга нисбатан чиқарилган ҳукм бўйич тушунтириш берган. Судда тушунтирилишича, Сакен Мамаш 2014 йилдан бери жабрланувчи билан қонуний никоҳда бўлган. Никоҳ даврида жабрланувчи икки фарзанд кўрган, уй бекаси бўлган, унга дипломатнинг рафиқаси сифатида нафақа ҳисобланган, буни маҳкумнинг ўзи олган. Уйдаги барча харажатларни Мамаш қоплаган.
“Маҳкум жабрланувчининг қариндошлари ва дугоналари билан мулоқот қилишини тақиқлаган, чеклаган, унинг қўнғироқлари, ёзишмалари ва ҳаракатланишини назорат қилган. Асоссиз рашк туфайли маҳкум давлат хизматчиси қасамёдини қабул қилган шахс сифатида 2019-2024 йиллар давомида мунтазам равишда Остонада, кейинчалик БАА, Абу-Дабида бўлганида жисмоний зўравонлик ишлатган, жабрланувчининг турли тана қисмлари ва бошига мушт билан тан жароҳати етказган”, дейилади хабарда.
Таъкидланишича, прокурор Мамашга нисбатан 6 йил, жабрланувчи эса 7 йил муддатга озодликдан маҳрум этиш жазосини тайинлашни сўраган. Судланувчи айбини тан олмаган.
Изоҳ (0)