Англияда шахсий суҳбатда Юрген Клоппни ҳақоратлаган ҳакам Девид Кутнинг видеоси сиздирилиши билан жанжал келиб чиқди. Ҳакамлик учун масъул ташкилот (PGMOL) Кутни жараёнлар ортда қолгунга қадар ҳакамликдан четлатди.
-NpHHUGFo.jpg)
Қизиқарлиси, айнан шу ҳакам шанба куни “Ливерпуль”нинг “Астон Вилла”га қарши учрашувини бошқарган.
Видеода ишлатилган ҳақоратлар: “Клопп — аҳмоқ”, “Ливерпуль аҳмоқлардек ўйнайди”.
Daily Mirror ҳолатга қуйидагича тушунтириш берди: Аввалроқ журналист Даррен Льюис Х (собиқ Twitter) ижтимоий тармоғида ҳакам ҳамма нарсани инкор қилганини ёзган эди, аммо Кутнинг ўзи гўё видеонинг ҳақиқийлигини тан олди. Бироқ Кут видеода нима дейилганини яхши эслай олмайди — видео бир неча йил олдин ёзиб олинган. Ижтимоий узоқлашиш ҳақидаги кинояли гаплар коронавирус пандемияси ва локдаун даврига ишора қилади.
Видеода нима дейилган?
Кут диванда ўтирган ҳолда дўстлари билан суҳбатлашмоқда ва ўзи захира ҳаками бўлган “Ливерпуль”нинг ўйинига баҳо бермоқда: “Ливерпуль жуда расво эди”.
Ҳакам Юрген Клопп ҳақидаги саволга шундай жавоб берди: “Нўноқ. жуда нўноқ”. Ва яна у қўшимча қилди: “У, ‘Бёрнли’га қарши ўйиндаги ишими танқид қилгани билан бирга, мени ёлғончиликда ҳам айблади. Менга бундай такаббур одамлар билан мулоқот қилиш қизиқ эмас. Лаънати немис”, дея ҳақорат қилган.
Кадр ортидан ҳам кимдир қуйидагича гапирган: “Қисқаси, Юрген Клопп — аҳмоқ, “Ливерпуль” жамоасининг ҳамма аъзоси аҳмоқлар. Биз скаузерлар*дан нафратланамиз”.
Иккинчи видеода Кут барчани огоҳлантиради: “Ҳаммангизга тушунарли бўлиши учун айтаман, бу лаънати видео ҳеч қаерга тарқалмасин”. Шундан кейин яна бир киши кадр ортидан “У Премьер Лига ҳаками, келинг, йигитнинг карьерасини бузмайлик”, дейди.
Видеодаги одамлар ширакайф бўлгани тахмин қилинмоқда.
Ушбу видеодан сўнг кўпчилик ҳакамнинг “Ливерпуль” ўйинларидаги турли эпизодларни эсламоқда. Пикфорднинг Ливерпуль дербисида четлатилмагани ва ван Дейкнинг жароҳати энг кўп муҳокамага сабаб бўлмоқда.
● Transfermarkt маълумотларига кўра, Девид “Ливерпуль”нинг саккизта ўйинини ҳакам сифатида бошқарган. Ушбу ўйинларда клуб беш бор ғалаба қозонган ва икки бора мағлубиятга учраган. Клопп шу саккизта ўйиннинг еттитасида “Ливерпуль”нинг бош мураббийи бўлган.
● Шанба куни “Ливерпуль” Премьер Лиганинг 11-турида “Астон Вилла”га қарши ўйинда 2:0 ҳисобида ғалаба қозонди. Биринчи бўлимда мунозарали ҳолат юз берди, ўшанда Дарвин Нуньес гол уришдан олдин, Муҳаммад Салоҳ Леон Бэйли билан қарама-қаршиликда йиқилди.
Кут голдан кейин қўполликни қайд этиб Бэйлини жазолаши мумкин эди. Ҳакам ўйинни давом эттириш мумкинлигига ишора қилди.
Кейинчалик ҳакам “Ливерпуль” дарвозасига пенальти белгиламади, мерсисайдлик футболчи Конор Бредлини кечирди.
● Кутнинг Клопп ҳақидаги гапларидаги ўйин “Ливерпуль”нинг 2020 йил ёзида “Бёрнли” билан ўз уйидаги дуранги (1:1) ҳисобланади. Ушбу ўйинда нафақат Клоппнинг, балки Эндрю Робертсоннинг ҳам жаҳли чиққанди: шотландиялик футболчи белгиланмаган пенальтидан норози бўлганди.
● Ғазабланган “Ливерпуль” мухлислари ўша ўйиндан бир неча ой ўтиб содир бўлган яна бир эпизодни эслади.
Ўшанда “Ливерпуль” дербида “Эвертон” билан тўқнаш келди ва Виржил ван Дейк Жордан Пикфорд билан тўқнашувдан кейин узоқ муддатга сафдан чиқди Инглиз ОАВлари “Эвертон” дарвозабони кўплаб таҳдидлар туфайли ҳаттоки тансоқчиларни ҳам ёллагани ҳақида ёзди.
Ушбу вазиятда Пикфордга ҳатто сариқ карточка ҳам кўрсатилмади — ВАР аралашувни зарур деб ҳисобламади. Ўша ўйинда Девид ВАР ҳаками сифатида ишлаган. Кейинчалик судья Майкл Оливер айбини тан олди: “Биз ҳаммамиз, шу жумладан мен ҳам ушбу вазиятни тўғри баҳолай олмадик. Биз ўша вазиятда офсайд қайд этиб Пикфордни майдондан четлатишимиз мумкин эди”.
● ВАРда ишлаган Кут иштирок этган яна бир эпизод ўтган мавсумда юз берган. Ўшанда Клопп “Арсенал” дарвозасига белгиланмаган пенальтидан ғазабланганди. PGMOL раҳбари Ховард Уэбб ўша пайтда ҳакамлар хатога йўл қўйганини тан олди.
Кут 2018 йилдан бери Премьер Лигада, 2020 йилдан бери FIFA’да ҳакам сифатида фаолият олиб бормоқда. Девид 16 ёшидан ҳакамлик қилади, ҳозир у 42 ёшда. Унинг фаолиятидаги энг муҳим баҳс 2023 йилги“Манчестер Юнайтед” ва “Ньюкасл” ўртасидаги Лига кубоги финали (2:0) ҳисобланади.
Англиядан ташқарида ҳам кам ишлаган. У Япония Лигаси ўйинлари, шунингдек, Чемпионлар Лигаси саралашидан ўрин олган “Слован” — “Динамо Батуми” ўйинида иштирок этган, Миллатлар Лигасида эса Арманистон — Эстония учрашувини бошқарган.
Энди ушбу рўйхат кенгайишига умид боғлаш қийин. Катта эҳтимол билан ҳакам қилган ишлари учун узоқроқ муддатга четлатилиши мумкин.
“Скаузер” (Сcоусер) – бу биринчи навбатда, Англиянинг Ливерпуль шаҳридан келган одамлар учун ишлатиладиган ноформал атама. Бу сўз Ливерпулнинг ўзига хос лаҳжаси ва маданиятига тегишли бўлиб, шаҳар аҳолиси орасида ўзига хос аксент ва нутқ услуби билан ажралиб туради.
Бу атама баъзан ҳазил ёки дўстона муҳитда ишлатилади. Бироқ, баъзи ҳолларда бу сўз салбий маънода ҳам ишлатилиши мумкин.
Изоҳ (0)