“Рома” клуби жорий мавсум якунида жамоани тарк этадиган Клаудио Раньерининг ўрнига янги бош мураббий изламоқда. Relevo нашрининг хабар беришича, бу лавозимга асосий номзодлардан бири — “Ноттингем Форест” устози Нуну Эшпириту Санту бўлиб турибди.
Маълумотларга кўра, римликлар аллақачон мутахассис билан боғланган ва унга икки йиллик шартнома таклиф қилган. Шунингдек, клуб раҳбарияти унга келажакдаги амбицияли лойиҳанинг бир қисми бўлишини ваъда қилмоқда. Мазкур лойиҳа доирасида жамоа Италия футболида юқори ўринлар учун кураша олиши тахмин қилинмоқда.
Мавсум якунига бир тур қолганида “Рома” А Серияда 5-ўринни эгаллаб турибди (66 очко). Жамоада Европа Чемпионлар Лигаси йўлланмасини қўлга киритиш учун имконият сақланиб қолган. Бунинг учун “бўрилар” навбатдаги турда ғалаба қозониши, шунингдек, параллел ўтадиган баҳсда “Ювентус” очко йўқотиши керак.
Аввалроқ ОАВда Юрген Клопп “Рома” бошқарувига келиши мумкинлиги ҳақида хабарлар тарқалган эди. Бироқ кейинчалик немис мутахассисининг вакиллари бу ҳақиқатга зид эканлигини айтди.
Шунингдек, ижтимоий тармоқларда Рим клуби кийиниш хонасида Эрик тен Ҳаг номи ҳам тез-тез тилга олинаётгани ҳақида миш-мишлар чиққанди.
Изоҳ (0)