“Ливерпуль” янги бош мураббий борасида бир тўхтамга келган

Лиссабоннинг “Спортинг” клуби бош мураббийи Рубен Аморим “Ливерпуль” бош мураббийи лавозимига асосий номзод ҳисобланмоқда.

Журналист Фабрицио Романонинг Х (собиқ Twitter) ижтимоий тармоғида хабар беришича, “Ливерпуль” клубига бош мураббийнинг “Спортинг” жамоасидаги шартнома банди ҳақида бир неча ҳафта илгари хабар берилган.

39 ёшли мутахассиснинг Португалия клуби билан шартномаси 2026 йилгача амал қилади. Унинг товон пули эса 15 миллион евро қилиб белгиланган. 

“Ливерпуль” 15 миллион еврони тўлашга тайёр, дея хабар берди ТеleFootball нашри. Томонлар тез орада музокараларни бошлаши кутилмоқда. 

Мерсисайдликларни бошқараётган Юрген Клопп жорий мавсум якунида жамоани тарк этади. Ҳозирда “Ливерпуль” 28 учрашув натижасига кўра 64 очко жамғарган ҳолда Англия Премьер Лигаси турнир жадвалида иккинчи ўринда бормоқда.

Навбатдаги ўйинда “Ливерпуль” Англия Премьер Лигасида “Брайтон”га қарши 31 март, якшанба куни майдонга тушади.