“Liverpul” klubi sobiq bosh murabbiyi Yurgen Klopp klublar o‘rtasidagi Jahon chempionatining yangi formati haqida fikrlarini bildirdi.
Mutaxassis bu futbol tarixidagi eng yomon g‘oya ekanligini bildirdi.
“Men ishtirok uchun to‘lanadigan pullar juda ko‘p ekanini aytgan odamlarni tushunaman. Lekin bu hamma klublarga taalluqli emas. O‘tgan yili Amerika kubogi va Yevropa Chempionati bo‘lgan. Bu yil klublar o‘rtasidagi Jahon chempionati, keyingi yili esa Jahon Chempionati. Bu shuni anglatadiki, futbolchilar ham jismonan, ham ruhan tiklanishga ulgurmaydi.
Albatta, ularning ko‘pchiligi katta pul ishlaydi. Biroq keling, bir daqiqa shundan uzoqlashaylik. NBA o‘yinchilari ham ko‘p pul olishadi, ammo ularda yiliga 4 oy ta‘til bo‘ladi”, degan germaniyalik murabbiy.
Klopp “Liverpul” himoyachisi Virjil van Deyk butun faoliyati davomida ham bunday dam olishni jamlay olmaganini aytdi.
“Klublar o‘rtasidagi JCH kabi turnirlar futbolchilar salomatligi hisobiga o‘tkazilmasligi kerak. Men hech kimga buni tilamasdim. Qo‘rqaman, kelgusi mavsum futbolchilar tarixdagi eng ko‘p jarohatlariga duch keladi. Agar bu kelasi mavsumda bo‘lmasa, u holda Jahon Chempionatida yoki undan keyin bo‘ladi”, degan Yurgen Klopp.
Mutaxassisning so‘zlariga ko‘ra, murabbiylar futbolchilardan har bir o‘yinga go‘yoki bu ular uchun so‘nggi o‘yinday yondashishlarini kutishini aytdi.
“Biz ularga buni yiliga 70 yoki 75 marta takrorlaymiz. Lekin bu boshqacha davom etishi mumkin emas. Ularga dam olish imkonini berishimiz kerak. Chunki agar bu bo‘lmasa, futbolchilar uzoq muddatda samarali ishlay olmaydi. Agar ular samarali o‘ynay olmasa, butun futbol olami o‘z qadriyatini yo‘qotadi.
Mening faoliyatimda faqat bir marta ikki haftalik yig‘in bo‘lgan, o‘sha paytda barcha futbolchilar mening ixtiyorimda bo‘lgan. Ikki yarim hafta. Shundan so‘ng bir yil davomida deyarli har uch kunda bitta o‘yin o‘tkazdik. Bu dahshat”, degan “Liverpul” sobiq bosh murabbiyi.
Izoh (0)