Теҳроннинг ядро қуролини яратиш тарафдорларига Эрон сиёсатида ўрин йўқ. Бу ҳақда мамлакат президенти Масъуд Пезешкиён баёнот берди.
“Эрон олий раҳбари бир неча бор таъкидлаганидек, мамлакатимиз сиёсати шундан иборатки, Эрон ядро қуролига эга бўлмайди ва ҳатто уни яратишга интилмайди. Бу сиёсатга мос келмайдиган позицияни эгаллаган ҳар қандай шахсга Эрон Ислом Республикаси сиёсатида ўрин йўқ”, дея Пезешкиённинг сўзларини унинг матбуот хизмати келтирди.
Маълум қилинишича, айрим депутатлар Теҳроннинг Ядро қуролини тарқатмаслик шартномасидан чиқиши тарафдори эдилар. Бир қатор ахборот порталларида парламент аллақачон шартномадан чиқиш тўғрисидаги қонун лойиҳасини кўриб чиқаётгани ҳақида маълумот пайдо бўлди, бироқ кейинчалик Эрон парламенти бу маълумотни рад этди.
Ўз навбатида, Эрон Ташқи ишлар вазирлиги шартнома бўйича қарорни юқори ҳокимият органлари қабул қилишини маълум қилди. Шунга қарамай, Теҳрон тарқатмаслик мажбуриятларига содиқ қолишини ва Яқин Шарқда ядро қуроли бўлмаслиги кераклигини таъкидлаган.
Пезешкиённинг таъкидлашича, Эрон атом энергиясидан фойдаланиш ва ядровий тадқиқотлар ўтказиш ҳуқуқига эга.
“Биз атом энергиясидан фойдаланиш ва жамият фойдасига ядро соҳасида тадқиқотлар ўтказиш ҳуқуқига эгамиз. Ҳеч ким биздан бу ҳуқуқни тортиб олишга ҳақли эмас”, дейди Пезешкиён.
Шунингдек, у Эрон “урушга интилмаганини” таъкидлаб, халқни “тажовуз қаршисида” бирлашишга чақирган.
Президентнинг сўзларига кўра, АҚШ Исроилнинг Эронга ҳужум қилишига йўл қўйиб, халқаро ҳуқуқни бузган.
Изоҳ (0)