Исроил мудофаа армиясининг бош штаби янги раҳбари Эял Замир 2025 йил Ғазо сектори ва Эронга қаратилган уруш йили бўлишини айтди. Бу ҳақда The Jerusalem Post нашри хабар берди.
Маълумотларга кўра, Замир тегишли баёнотни олий ҳарбий қўмондонликка мурожаатида айтган. У Исроил армияси бошқа йўналишларга ҳам эътибор қаратишини таъкидлаган. Замир “ғалаба” тушунчасига муҳим қадрият сифатида урғу берган. Унинг айтишича, сўнгги йилларда Исроил армияси нисбий ғалаба ёки тийиб туришгагина эътибор қаратган.
Замир 5 март куни расман Исроил мудофаа армияси бош штаби бошлиғи лавозимига киришди. Маросимда Замирга Исроил армиясидаги энг юқори генерал-лейтенант унвони тантанали равишда топширилди. Бош штабнинг янги раҳбари ишонч учун миннатдорлик билдирди ва Исроилни ҳарбий муваффақиятларга олиб боришга ваъда берди.
Ғазо секторида гаровга олинганларнинг оилаларига мурожаат қилар экан, Замир уларни қутқариш учун қўлидан келган барча ишни қилишга ишонтирди. Бундан ташқари, у янги танк дивизиясини тузишга ва янги пиёдалар дивизиясини ташкил этиш масаласини кўриб чиқишга қарор қилди.
Изоҳ (0)