Британиялик Тесс Кристиан исмли аёл бутун ҳаётини бир қарорга асослаб қурди: у табассум қилмаса, ажинлар пайдо бўлмайди, деб ўйлади. Сўнг аста-секин юз мимикасини назорат қилишни ўрганди. Дўстлар билан йиғилса ҳам, оиласи билан байрам қилса ҳам, ҳатто қизининг туғилиши каби бахтли лаҳзаларда ҳам лабларини жимгина ушлаб, ҳиссиётларини фақат кўзлари орқали ифодалар эди.
Аслида барчаси Тесснинг ўсмирлик даврига бориб тақалади. У Лондондаги католик мактабида ўқиди ва у ердаги қатъий қоидаларга риоя қилиб яшади. Тесс доимий танбеҳлар эшитгани туфайли юз ифодаларини назорат қилишга ўрганди. Мактабда ҳар қандай ортиқча ҳис-туйғуни, жумладан, кулишни намоён қилиш танқид ва таъна билан қабул қилинар эди. Шу сабабли Тесс доимий жиддий кўринишни одат қилди.
Албатта, унинг ҳаётида ҳис-туйғуларни назорат қилиш деярли имконсиз бўлган воқеалар ҳам содир бўлди, бироқ Тесс ўз қарорига содиқ қолиб, кулишни фақат кўзлари билан ёки жимгина, одатдаги юз ифодаларисиз намойиш қилишни ўрганиб олди.
Бундай ҳаёт услуби унга ажинсиз, силлиқ тери ва ёшроқ кўриниш имконини берди. Эллик ёшга етганида унинг юзидаги ажинлар деярли кўзга ташланмасди. Бироқ бундай гўзалликнинг қиймати жуда баланд эди.
Психологлар фикрича, табассум яхши кайфият билан бир қаторда руҳий саломатликнинг муҳим элементи ҳисобланади. Кулиш эндорфин — бахт гормонини ишлаб чиқаради, стрессни камайтиради, инсонни атрофдагилар билан боғлайди. Тесс эса буни деярли ҳис қилмай, ўзини чеклар эди.
Тўғри, юз мимикасини назорат қилиш ажинларни секинроқ пайдо бўлишига ёрдам беради, лекин ажинлар тушишига бошқа сабаблар — коллаген камайиши, қуёш нури ва ёшга боғлиқ ўзгаришлар ҳам таъсир қилишини инобатга олиш керак.
Тесснинг дўстлари уни “Жаконда” деб чақиради, чунки унинг юзидаги жимлик сирли ва қизиқарли таассурот қолдирарди. У гўзал, силлиқ териси билан ажралиб турса-да, руҳий жиҳатдан кўплаб имкониятлардан маҳрум бўлган эди.
Замонавий косметологлар ёш кўринишни сақлашнинг табиийроқ йўлларини тавсия қилади. Масалан, терини нам сақлаш, қуёшдан ҳимоя қилувчи кремлардан фойдаланиш, юз массажи орқали мушак тонусини яхшилаш, стрессни камайтириш, уйқу режими ва тўғри овқатланиш — буларнинг бари ажинларни секинроқ пайдо бўлишига ёрдам беради.
Шунингдек, мутахассислар мимикаларни тез-тез ишлатиш орқали ажинлар чуқурлашини тан олади, аммо табиий ва меъёрий ҳаракатлар терига зарар келтирмайди.
Тесс Кристиан эса 40 йил давомида кулмаслик орқали ёш ва ажинларсиз юз терисига эга бўлди, лекин бундай ҳаёт унинг руҳий ва эмоционал дунёсига ўз таъсирини кўрсатди.
Тўғри, гўзалликка интилиш керак, аммо ҳаётимизда бошқа такрорланмайдиган қувончли онларни ўтказиб юбориш ҳеч қандай гўзалликка тенг келмайди.
Изоҳ (0)