Исроил Мудофаа кучларининг Ғазо секторидаги ҳарбий операцияси муваффақиятсизликка учради, аммо АҚШ шунга қарамай, Яқин Шарқдаги иттифоқчиларини қўллаб-қувватлашда давом этмоқда, деди Эрон ташқи ишлар вазири Ҳусайн Амир Абдуллоҳийён.
“Биз аллақачон АҚШ Исроил армиясининг Ғазо секторидаги уруш жиноятларига алоқадор бўлишни истамаётгани, бироқ шу билан бирга Исроил режимини фаластинликларга қарши муваффақиятсиз ҳарбий амалиётида қўллаб-қувватлашда давом этаётгани ҳақида сигналларни олмоқдамиз”, — деди у Доҳада Қатар бош вазири Муҳаммад бин Абдул Раҳмон Ол Тани билан учрашувда.
Эрон Ташқи ишлар вазирлиги раҳбари, шунингдек, АҚШнинг Исроилни қўллаб-қувватлаши уларнинг сиёсий ва ҳарбий мағлубияти кўламини янада оширишини қўшимча қилди.
Аввалроқ Эрон Ташқи ишлар вазирлиги Абдуллоҳийён Доҳада Фаластиннинг ҲАМАС ҳаракати Сиёсий бюроси раҳбари Исмоил Ҳания билан учрашгани ва у билан Ғазо сектори ва Ғарбий Соҳилдаги вазиятни муҳокама қилгани ҳақида маълум қилганди. Бу ҲАМАС ва Исроил ўртасидаги можаро яна қизғин паллага кирган 7 октябрдан бери Ислом Республикаси Ташқи ишлар вазирлиги раҳбарининг Қатарга тўртинчи ташрифидир.
Изоҳ (0)