Ўзбекистон ТИВ фуқароларга мурожаат билан чиқиб, Исроил—Эрон можароси бўйича провокация ва ҳақоратомуз чақириқларга учмасликка чақирди.
-IHdOR0Bk.avif)
Қайд этилишича, сўнгги кунларда Яқин Шарқ минтақасида, хусусан, Исроил ва Эрон ўртасидаги кескинлик янада кучайиб, қуролли тўқнашувларга айланди. Бу эса нафақат минтақада, балки бутун дунё ҳамжамиятида жиддий хавотир уйғотмоқда.
Можаронинг авж олиши бутун минтақа барқарорлиги ва тинчлигига таҳдид солаётгани шубҳасиз. Бу жараёнлар, аввало, оддий фуқаролар — тинч аҳоли, айниқса болалар ва аёллар учун оғир оқибатларга олиб келмоқда.
“Ўзбекистон Республикаси урушни муаммоларни ҳал этиш воситаси деб эмас, балки инсон ҳаёти, барқарорлик ва тараққиётга жиддий хавф солувчи ҳолат сифатида баҳолайди. Урушда ғолиб бўлмайди. Энг катта йўқотишни доим оддий инсонлар тортган ва бугун ҳам шундай бўлмоқда”, дейилади вазирлик хабарида.
Ўзбекистон ҳар доим тинчликпарвар сиёсат юритиб келгани ва шундай давом этиши таъкидланган.
“Шу муносабат билан, Ўзбекистон фуқароларини тинчликпарварлик, бағрикенглик ва масъулиятли фуқаролик позициясини сақлашга чақириб қоламиз. Можароларга нисбатан диний, ирқий ёки бошқа шахсий мансубликлар асосида муносабат билдирмаслик, ҳар қандай нафрат ва зиддият тарғибига қарши туриш барчамизнинг умумий бурчимиздир.
Шунингдек, фуқароларимизни турли провокация ва ҳақоратомуз чақириқларга учмасликка, ҳолатларга нисбатан ҳиссиёт эмас, балки вазмин муносабатни сақлаб қолишга даъват этамиз. Жамиятимизда миллий ва диний тотувликни сақлаш — умумий барқарорлик ва хавфсизликнинг муҳим кафолати эканини эслатамиз”, дейилади вазирлик мурожаатида.
Ўзбекистон ТИВ барча можаролар халқаро ҳуқуқ нормалари ва дипломатик мулоқот асосида тинч йўл билан ҳал этилиши тарафдори эканини яна бир бор билдирди. Тинчлик ва ўзаро ҳурмат асосидаги муносабатлар ҳар доим Ўзбекистон ташқи сиёсатининг устувор йўналиши бўлиб қолади.
Изоҳ (0)