АҚШ президенти Дональд Трамп Эрон Исроил ва ҲАМАС ўртасида гаровга олинганлар учун ўт очишни тўхтатиш бўйича келишув музокараларида иштирок этаётганини айтди. Бу ҳақда Arab News хабар берди.
“Ғазо ҳозир биз ва ҲАМАС ҳамда Исроил ўртасидаги кенг кўламли музокаралар ўртасида. Эрон эса бу жараёнда иштирок этмоқда. Ғазо билан нима бўлишини кўрамиз. Гаровга олинганларни қайтариб олмоқчимиз”, деди Трамп Оқ уйдаги тадбирда.
Трамп Эроннинг иштироки тафсилотлари ҳақидаги сўровга тўлиқ жавоб бермаган. Қўшма Штатлар Исроил ва ҲАМАС ўртасида 60 кунлик сулҳ тузишни таклиф қилганди. Исроил шартларга риоя қилишини айтган, аммо ҲАМАС ҳозирча бу режани рад этган.
Таклифга кўра, 1 236 нафар фаластинлик маҳбус ва 180 нафар ҳалок бўлган фаластинликнинг жасадларини озод қилиш режалаштирилган. Биринчи ҳафтада гаровга олинган 28 нафар исроиллик озод қилиниши кутилмоқда.
Қўшма Штатлар ва Эрон Теҳроннинг ядровий дастури бўйича ҳам алоҳида музокаралар олиб боришга ҳаракат қилмоқда.
Изоҳ (0)