Молиявий империя: ҲАМАСни кимлар молиялаштиради?

Вашингтондаги Яқин Шарқ сиёсати институти эксперти Метю Левитт Фаластиннинг ҲАМАС гуруҳини ким молиялаштиришини айтди. Бу ҳақда Bild хабар берди.

Мутахассис АҚШ Конгрессига тақдим этган ҳисоботида тегишли маълумотларни киритди. 

“ҲАМАС йиллар давомида Европа Иттифоқи, БМТ ва бошқа халқаро ташкилотлардан, Эрон, Россия, Сурия ёки Қатар каби давлатлардан, шунингдек, назорат остидаги қурилиш компаниялари ва банклардан пул олмоқда”, — дейилади ҳужжатда.

Левиттнинг таъкидлашича, ҲАМАС солиқлар, “товламачилик”, чегара назорати ва Ғазо секторини назорат қилишнинг бошқа воситаларидан ҳар йили 300 миллион доллардан 400 миллион долларгача даромад олади.

Бирлашган Миллатлар Ташкилотининг (БМТ) баъзи ҳисоб-китобларга кўра, 2014 йилдан 2020 йилгача Ғазо секторига 4,5 миллиард доллар сармоя киритилган. Ғазо Евроиттифоқ тузилмаларидан 730 миллион доллар, Германиядан эса яна 360 миллион доллар олган. 

“Бу пулларнинг қанчаси ҲАМАС қўлига тушгани номаълум”, — дейди эксперт.

Ғазо секторидаги ҲАМАС “ҳукумати”нинг йиллик бюджети камида 2,4 миллиард долларни ташкил қилади. 

“Шунга қарамай, анклав аҳолиси қашшоқликда яшайди”, — дейди у.

Шунингдек, Левитт ҲАМАС Рафаҳ (Миср) ва Керем Шалом (Исроил) чегара пунктлари орқали Ғазога кирадиган товарларга солиқ солишдан йилига ярим миллиард доллар даромад топишини айтмоқда.

ҲАМАС молиявий империяси гуруҳнинг бир қанча топ-менежерлари томонидан назорат қилинади. Улар ҲАМАС сиёсий бюросига бўйсунади, бюронинг аксар раҳбарлари Туркия, Миср, Қатар ва Иорданияда сургунда.

“Ҳатто баъзилари сохта исмлар ва сохта паспортлар билан фаолият юритади”, — дейди Метю Левитт.