Эрон қанотли ва баллистик ракеталар захиралари сақланадиган ерости ҳарбий базасини намойиш қилди. Бу ҳақда Tehran Times хабар берди.
Кадрлар Ислом инқилоби қўриқчилари корпуси (ИИҚК) аэрокосмик кучларининг ракета бўлинмасидан олинган. Унда Kheibar Shekan, Sejjil, Emad, Haj Qasem, Paveh, Ghadr-H ва бошқа ракеталар тасвирланган. Ушбу базадан 2024 йилнинг октябрь ойида биринчи марта Исроилга 200 га яқин ракета, жумладан, гипертовушли ракеталар билан ҳужум қилиш учун фойдаланилгани айтилмоқда. Ўшанда Исроил бунга жавобан Эрон ичидаги ҳарбий объектларни нишонга олганди.
Видеода Эрон Қуролли кучлари штаб бошлиғи генерал майор Муҳаммад Багери ва ИИҚК ҳаво-космик кучлари қўмондони бригада генерали Амир Али Ҳожизода ҳарбий йўлтанламас транспорт воситасида туннел бўйлаб жойлашган ракета стеллажлари ва юк машиналарига ўрнатилган учириш мосламалари ёнидан ўтаётганини кўриш мумкин.
Эроннинг ерости базалари видеоси АҚШ президенти Дональд Трампнинг таҳдидлари фонида эълон қилинди. У Теҳронга янги ядровий келишувга эришиш учун икки ой муҳлат берган эди. 2018 йилда Трамп собиқ президент Барак Обама имзолаган ядровий қурол бўйича олдинги келишувдан чиққан.
Январь ойида ИIQК иккита ерости ҳарбий базаси ҳақида хабар берган эди, улардан бири денгиз флоти эҳтиёжларини қондиради. Бундан ташқари, 4 минг километргача бўлган масофага 13 тагача жанговар зарядларни олиб юришга қодир бўлган “Ғазо” ўта оғир дрони тақдим этилган.
Изоҳ (0)