АҚШ Исроилга Америка қурол-яроғи ва ҳарбий техникасини харид қилиш учун 3,5 миллиард доллар ажратишни режалаштирмоқда, деб ёзади CNN хабардор манбаларга таяниб.
Қайд этилишича, Исроил бундай маблағни дарҳол ололмайди, чунки мамлакат харид қилмоқчи бўлган қурол-яроғ тизимлари ҳали ҳам ишлаб чиқариш жараёнида.
CNN суҳбатдошларига кўра, 8 август куни АҚШ Давлат департаменти Конгрессга президент Жо Байден маъмурияти Исроилга “бир неча миллиардлаб хорижий ҳарбий маблағлар” беришни режалаштираётгани ҳақида хабар берган. Маблағлар АҚШ расмийлари апрель ойида тасдиқлаган 14,1 миллиард долларлик ёрдам пакетидан ажратилади.
Молиялаштириш Исроилга Қўшма Штатлардан замонавий қурол тизимлари ва бошқа жиҳозларни сотиб олиш имконини беради, дея аниқлик киритади CNN. Телеканал манбаларига кўра, маблағ шу ҳафта, Исроил ва бутун минтақа Эрон ва “Ҳизбуллоҳ” ҳужумига тайёрланаётган бир пайтда ажратилмоқда.
Бир кун аввал, 9 август куни Қатар, Миср ҳамда АҚШ Исроил ва ҲАМАСни Ғазо секторида ўт очишни тўхтатиш ва гаровга олинган исроилликларни озод қилиш бўйича музокараларни қайта бошлашга чақирган эди. Бунга жавобан Исроил бош вазири Биньямин Нетаньяху идораси Исроил делегацияси 15 август куни тинчлик музокараларига жўнаб кетишини маълум қилди.
Изоҳ (0)