Европа Иттифоқи Россияни ҳарбий технологиялардан маҳрум этувчи ва унинг энергия савдосидан олинадиган даромадларини камайтиришга қаратилган 17-санкциялар пакетини тасдиқлади. Чекловлар доирасида Ўзбекистон компаниясига ҳам санкция жорий этилди.
Санкциялар Россиянинг “соядаги флоти” деб аталувчи нефть танкерларига, уларнинг операторларига ҳамда мамлакатнинг энг йирик нефть ишлаб чиқарувчилардан бирига қаратилган. Украинага қарши урушда Россия ҳарбий-саноат мажмуасини қўллаб-қувватлагани учун 31 та компания ҳам рўйхатга киритилган.
Улар орасида Ўзбекистонда рўйхатдан ўтган Trade Engine System компанияси ҳам бор. Устав фонди 10 миллион сўм бўлган бу компания 2022 йил июль ойида ташкил этилган. У “темир йўл, автотранспорт, денгиз ва ҳаво йўлларида юк ташишни ташкил этиш” фаолияти билан шуғулланади. Компаниянинг ягона таъсисчиси ва директори — Акбаров Носиржон Хамитжанович.
Янги санкциялар пакети уруш бошланганидан буён энг кенг қамровли бўлиб, гибрид чораларни, инсон ҳуқуқларини бузганлик учун жазо чораларини ҳамда кимёвий қуроллар билан боғлиқ санкцияларни ўз ичига олади. Путин тинчликка интилаётгандек кўринаётган бир пайтда, янги санкциялар тайёрланмоқда.
Россия ва унга кўмаклашаётганларнинг ҳаракатлари жиддий оқибатларга олиб келади. Россия ўзининг ноқонуний ва шафқатсиз урушини қанчалик узоқ давом эттирса, бизнинг жавобимиз шунчалик қаттиқ бўлади, деди Европа дипломатияси раҳбари Кая Каллас.
Санкциялар рўйхатига учинчи мамлакатларга тегишли 189 та кема киритилган. Натижада санкция остидаги кемалар сони 342 тага етган. Европа Иттифоқи “соядаги флот” фаолиятини таъминловчи юридик шахсларга нисбатан ҳам индивидуал санкциялар жорий қилган. Бу рўйхатга Россия нефтини ташиётган БАА, Туркия ва Гонконгда рўйхатдан ўтган фирмалар ҳам киради.
Европа Иттифоқи нефть нархини чеклаш ва “соядаги флот”га қарши санкциялар киритганидан бери Россиянинг тегишли даромадлари 38 миллиард еврога камайган. 2025 йил март ҳолатига кўра, Россиянинг бу йўналишдаги даромадлари 2023 йил мартига нисбатан 13,7 фоизга, 2022 йилга нисбатан эса 20,3 фоизга қисқарган.
Европа Иттифоқининг аввалги санкциялар пакети 24 февраль куни — Россиянинг Украинага кенг кўламли бостириб кириши бошланганининг уч йиллиги муносабати билан жорий этилган эди. Ўзбекистон компаниялари орасида Uzstanex ҳам чекловларга учраганди, унга қарши аввалроқ АҚШ ва Буюк Британия санкциялари жорий этилган эди.
Изоҳ (0)