АҚШ 21 май куни Россияга етиб бора оладиган Minuteman III қитъалараро баллистик ракетасини режали синовдан ўтказди. Бу ҳақда Deutsche Welle хабар берди.
Парвоз Калифорния штатидаги Ванденберг авиабазасида амалга оширилган.
Ушбу синов учирилиши мунтазам ва даврий тадбирларнинг бир қисми ҳисобланади. У Қўшма Штатларнинг ядровий тўхтатиш қуроли XXI аср таҳдидларини жиловлашда хавфсиз, ишончли ва самарали эканини намойиш этиш ҳамда иттифоқчиларимизни хотиржам қилиш мақсадида ўтказилди, дейилади хабарда.
Ракета битта a Mark-21 High Fidelity De-Entry жанговар каллаги билан жиҳозланган. Ракетанинг бош қисми Тинч океанининг марказий қисмидаги ракетага қарши мудофаа синов майдонигача тахминан 6 700 километр масофани босиб ўтган.
Minuteman III қаттиқ ёқилғили қитъалараро баллистик ракетаси 1970 йилдан бери АҚШ армиясида мавжуд. Унинг оғирлиги тахминан 36 тонна, максимал парвоз масофаси 9 500 километрдан ортиқ, тезлиги эса соатига 24 минг километрдан ошади. Бу АҚШ стратегик ядровий кучлари таркибидаги ягона шахтага асосланган қитъалараро баллистик ракетасидир.
Айни пайтда Қўшма Штатлар ҳар бири учтагача ядро каллагини олиб юришга қодир 400 та шундай ракетага эга, дейилади АҚШ ҳарбий-ҳаво кучлари сайтида.
Қўмондонлик таъкидлашича, Minuteman III ҳали ҳам АҚШнинг стратегик тўхтатувчи кучлари асосини ташкил этади.
Россияга етиб бора оладиган Minuteman III ракетасини синовдан ўтказиш Россия Хавфсизлик кенгаши раиси ўринбосари Дмитрий Медведевнинг Ғарбга жаҳон уруши билан таҳдид қилган баёнотидан кўп ўтмай амалга оширилди. Медведев 20 май куни Петербург халқаро юридик форумида сўзлаган нутқида Ғарб давлатларининг Москвага нисбатан сиёсати дунёни учинчи жаҳон урушига олиб бораётганини таъкидлади.
У Россиянинг Украинага бостириб кириши ҳақида гапирмаган ҳолда, Киевни қўллаб-қувватловчи давлатларни ушбу мамлакат ҳудудидаги ҳар қандай тинчликпарвар кучлар Россия армияси учун “қонуний ҳарбий нишон” сифатида кўрилиши ҳақида огоҳлантирди.
Изоҳ (0)