Россия президенти Владимир Путин 20 май куни Курск вилоятига ташриф буюрди. Бу ҳақда Россия президенти матбуот хизмати хабар берди.
Кремлнинг таъкидлашича, 20 май куни ташриф чоғида Путин кўнгилли ташкилот вакиллари билан учрашган ва Курск-II атом электр станциясига ташриф буюрган.
Давлат телевидениеси Путиннинг кўнгиллилар ва маҳаллий амалдорлар, жумладан губернатор вазифасини бажарувчи Александр Хинштейн билан учрашганини кўрсатган. Президентга Кремль штаб бошлиғининг биринчи ўринбосари Сергей Кириенко ҳамроҳлик қилган.
“Бўлинмаларимиз олдида турган барча жанговар вазифалар бажарилишига ва Курск вилояти ҳудуди тез орада душмандан тўлиқ озод қилинишига ишонаман”, деди у давлат телевидениеси эфирида.
Россия Қуролли кучлари бош штаби бошлиғи Валерий Герасимов 26 апрелда Курск тўлиқ озод этилганини айтганди. Украина Қуролли кучлари эса маълумотни рад этганди.
2024 йил 6 августда Украина армияси Курск вилоятида ҳарбий операцияни бошлади. 12 августга келиб 28 та аҳоли пункти Украина кучлари назоратига ўтгани ҳақида ўша пайтда вилоят губернатори вазифасини бажарувчи Алексей Смирнов хабар берди. Январь ойида Россия Мудофаа вазирлиги Украина томони минтақанинг 1 268 кв/км ҳудудини эгаллаб олганини маълум қилди (Курск вилоятининг умумий майдони — 29,9 минг кв/км). 2025 йил январь ойи ўрталарига келиб, Россия идораси маълумотларига кўра, 801 кв/км (63,2 фоиз) қайтариб олишга эришилган. Февраль ойида эса Курск вилоятининг 64 фоизи назоратга қайтарилган.
Зеленскийнинг сўзларига кўра, Курскдаги операциянинг асосий вазифаси Россиянинг ҳарбий салоҳиятини имкон қадар йўқ қилиш, қарши ҳужумларни кучайтириш ҳамда Россия ҳудудида буфер зона яратишдан иборатдир. Апрель ойида Россия президенти Владимир Путин Курск вилояти тўлиқ озод этилганини эълон қилди. Украина Қуролли кучлари эса вилоятдаги жанглар давом этаётганини маълум қилди.
Маълумот ўрнида Путин олдин март ойида Курскка бориб, фронтдаги вазият билан танишган эди. Бу Украина кучлари 2024 йилнинг 14 август куни мазкур йўналишда ҳужумга ўтганидан бери илк ташриф бўлган.
Кремль томонидан эълон қилинган кадрларда унинг Курск вилоятидаги қўмондонлик марказига ҳарбий формада келгани, у ерда Путинни Россия қуролли кучлари бош штаби раҳбари Валерий Герасимов кутиб олгани акс этган эди.
У, шунингдек, Халқаро Женева конвенцияси меъёрлари Украина томонида жанг қилган хорижлик жангчиларга нисбатан татбиқ этилмаслигини айтган.
Курскдаги вазият
Россия қуролли кучлари Бош штаби раҳбари Путинга ҳисобот бериб, Курск вилоятида жанг қилаётган Украина қўшинлари қуршовга олинганини айтган.
Путин рус қўмондонларига Украина қўшинларини Курск вилоятидан имкон қадар тезроқ чиқариб юборишни буюрган.
Россия раҳбари, шунингдек, Украинанинг Курск вилояти билан чегарадош Суми вилоятида буфер зона яратиш варианти кўриб чиқилаётганини маълум қилган. Унинг сўзларига кўра, мазкур ташаббус Украина кучларининг эҳтимолий ҳужумларидан “суғурталаниш”га ёрдам беради.
Герасимовнинг айтишича, Россия армияси Курск йўналишида Украина назоратида бўлган ҳудудларнинг 86 фоизини қайтариб олган. Бу эса тахминан 1 100 квадрат километр майдонни ташкил қилади.
Бош штаб раҳбарининг даъво қилишича, Украина томони Курск вилоятини Россия билан келгусидаги музокараларда айирбошлаш учун “карта” сифатида фойдаланмоқчи бўлган, бироқ бу режа иш бермаган.
Бундан ташқари, у “Курск операцияси”дан кўзланган яна бир мақсад — “Россия қўмондонлигини Донбасс фронтидан кучларини олиб чиқишга мажбурлаш” ҳам амалга ошмаганини таъкидлаган
Қарши томон нима дейди?
Путиннинг Курск вилоятига ташрифи билан бир вақтда Украина қуролли кучлари бош қўмондони йўқотишларни камайтириш учун чекиниш буйруқ бериши мумкинлигига шама қилган.
Украина президенти эса Киев ўз аскарлари ҳаётини сақлаб қолиш учун максимал ҳаракат қилаётганини таъкидлаган.
Украина томони мазкур йўналишидаги вазиятга расман аниқлик киритмаган бўлса-да, Financial Times нашри Киев энг жанговар бригадаларни Курск вилоятидан босқичма-босқич олиб чиқаётгани ҳақида хабар берди. DeepState лойиҳаси эса интерактив харитани янгилаб, Суджа шаҳрини Украина армияси назоратидан чиқариб ташлади.
Изоҳ (0)