Саудия Арабистони АҚШ билан 200 га яқин MQ-9 дронларини харид қилиш бўйича музокаралар олиб бормоқда. Бу ҳақда ишлаб чиқарувчи Генерал Атомиcсъга таяниб, Breaking Defense нашри хабар берди.
Компания вакилининг маълум қилишича, Ар-Риёд ва Вашингтон ўртасида 200 тагача учувчисиз учиш қурилмалари сотиб олиш бўйича музокаралар узоқ вақтдан бери давом этяпти. Мазкур битим президент Дональд Трампнинг мамлакатга сафари давомида эълон қилинган 142 миллиард долларлик мудофаа шартномаси доирасига киради. Бироқ Оқ уй ушбу пакетнинг аниқ тафсилотларини ошкор қилмаган.
Маълум қилинишича, келишув MQ-9 оиласининг SkyGuardian ва SeaGuardian каби турли моделларини ўз ичига олиши мумкин. Генерал Атомиcс вакили шартнома “Қўшма Штатларда 46 мингга яқин иш ўрни яратиши ва миллий иқтисодиётга катта таъсир кўрсатиши”ни таъкидлаган.
Мазкур келишув Дональд Трампнинг Форс кўрфазига ташрифи билан боғланаётган бўлса-да, музокаралар анча олдин бошланган. Компания президенти Девид Александр 2024 йили саудлар билан музокараларга тўхталиб, уни компания тарихидаги “энг йирик халқаро битим” деб атаган эди.
Бирлашган Араб Амирликларидаги Рабдан хавфсизлик ва мудофаа институти катта тадқиқотчиси Кристиан Александр Ар-Риёд йирик сондаги учувчисиз учиш қурилмаларини сотиб олаётганига диққат қаратди. Унинг таъкидлашича, бу Саудия ҳарбий доктринаси ва разведка инфратузилмасида кенг кўламли ислоҳот режалаштирилаётганидан далолат беради.
“Бундай катта рақамлар нафақат тактик, балки стратегик мақсадларга йўналтирилган: бутун мамлакат ҳудудини қамраб олиш, минтақавий таҳдидларни жиловлаш, разведка ва зарбдор тизимларни дронларга асослаб, қатламли шаклда қуриш режалаштирилмоқда”, деган у.
Тадқиқотчининг битим Саудия Арабистони АҚШ дрон тизимларига қайта устуворлик бераётганининг сиёсий ишораси эканини ҳам қўшимча қилган. Боиси мамлакат аввалроқ Хитойнинг Wing Loong ва Туркиянинг Bayraktar TB2 дронларига қизиқиш билдирган эди.
Бироқ мазкур воқеа MQ-9 дронларининг ишончлилиги савол остига олинган пайтга тўғри келди. Оммавий ахборот воситаларида тарқалган хабарларга кўра, Яман ҳусийлари сўнгги 6 ҳафта ичида АҚШ кучларига тегишли 7 та учувчисиз учиш қурилмасини уриб туширган. 2023 йилнинг 7 октябрь воқеаларидан буён эса умумий ҳисобда 21 та дрон сафдан чиқарилган.
Мустақил тадқиқотчи Якопо Мариа Маззукко MQ-9 дрони минтақа учун йирик қийматга эга платформа бўлиб қолаётганини, бироқ ҳаво мудофаа тизимлари учун заифлигини таъкидлади. У Яман ҳусийлари Россия ва Хитой каби давлатлардан фарқли, илғор тизимларга эга эмаслигига ишора қилган.
Тадқиқотчилар фикрича, Саудия Арабистони MQ-9 дронларидан чегара патрули, қирувчи самолётлар учун нишонларни белгилаш, қуруқликдаги қўшинлар учун разведка маълумотлари тўплаш каби миссияларда фойдаланади.
Изоҳ (0)