Ukraina prezidenti Vladimir Zelenskiy rossiyalik hamkasbi Vladimir Putin ishtirok etmasligi sababli Istanbuldagi muzokaralarda qatnashishdan ma’no ko‘rmayotganini bildirdi. Bu haqda Zelenskiy Anqarada Turkiya prezidenti bilan muzokaralar yakunlari bo‘yicha o‘tkazilgan matbuot anjumanida ma’lum qildi.
“Mening borishimdan foyda yo‘q. Putin kelmadi, keladimi - bilmaymiz. Prezident Tramp ham ma’lum bir xabar yubordi, balki kelar. Har holda, hozircha aniq qaror yo‘q”, dedi u.
Ukraina prezidenti Rossiya tomoni Istanbulda rejalashtirilgan muzokaralarga “jiddiy yondashmaganini” aytgan.
Uning so‘zlariga ko‘ra, Rossiya delegatsiyasi tarkibida biror qaror qabul qilishga vakolatli rasmiy shaxslar yo‘q.
Ukraina rahbari ta’kidlashicha, aynan Rossiya to‘g‘ridan-to‘g‘ri muzokaralar tashabbusi bilan chiqqan va buni, jumladan, AQSH prezidenti Donald Tramp ham qo‘llab-quvvatlagan.
“Rossiya tomonining ishtiroki past darajada bo‘lishiga qaramay, Ukraina prezidentlar Tramp va Erdo‘g‘onga hurmat yuzasidan tinchlikka sodiq qolishda davom etadi”, dedi u.
Shuningdek, Zelenskiy uchrashuv to‘rt tomonlama formatda, Ukraina, Rossiya, Turkiya va AQSH delegatsiyalari ishtirokida o‘tkazilishi kerakligini bildirgan.
Istanbulda Rossiya bilan muzokaralarda Ukraina delegatsiyasiga mudofaa vaziri Rustem Umerov boshchilik qiladi.
“Men hozir Istanbulga delegatsiyamizni yuborishga qaror qildim, lekin hammasini emas... Delegatsiyaga mudofaa vaziri rahbarlik qiladi”, dedi Zelenskiy.
Uning aytishicha, Ukraina delegatsiyasi muzokaralarda o‘t ochishni to‘xtatish masalasini muhokama qilmoqchi.
Shuningdek, Ukraina Prezidenti Turkiya prezidenti Rajab Toyyib Erdo‘g‘onga muzokaralarni tashkil etgani va ular uchun joy taqdim etgani uchun minnatdorchilik bildirgan.
“Bundan tashqari, prezident Erdo‘g‘on Qrim Ukrainaning bir qismi ekanligi haqidagi o‘z pozitsiyasini ham tasdiqladi”, dedi u.
Kiyev AQSH va Turkiyadan Ukraina va Rossiya o‘rtasida Istanbulda muzokaralar o‘tkazish muddatlari bo‘yicha aniq ma’lumotlarni kutmoqda.
“Biz AQSH va Turkiyadagi hamkasblarimizdan muzokaralar vaqti va sanasi bo‘yicha aniq xabarlarni kutmoqdamiz. Ular bugun yoki ertaga o‘tkazilishi mumkin”, dedi Ukraina prezidenti.
Zelenskiyning ta’kidlashicha, Ukraina Rossiya bilan muzokaralardan manfaatdor va uchrashuv “baribir bo‘lib o‘tishiga” umid qilmoqda.
“Tinchlikka olib kelishi mumkin bo‘lgan eng kichik qadamni ham hech kim e’tiborsiz qoldirmaydi. Bizning pozitsiyamiz konstruktiv bo‘lib qoladi”, deya qo‘shimcha qildi u.
Rossiya prezidenti Vladimir Putin 15-may kuni Istanbulda Ukraina bilan to‘g‘ridan to‘g‘ri muzokaralarni boshlashni taklif qilgandi. Ukraina prezidenti Vladimir Zelenskiy mazkur muzokaralarda Putinni shaxsan kutishini aytdi.
Izoh (1)
путин зеленскийни рахбар сифатида курмиди менимча чунки бу зеленский сиёсатни тушунмиди россия босиб оляпти деб жар солорадию́ америкага индаме борини куш куллаб бериб куйоради