Россия президенти Владимир Путиннинг маслаҳатчиси Антон Кобяков Санкт Петербург халқаро юридик форумида СССР ҳуқуқий жиҳатдан ҳозир ҳам мавжуд эканини айтганди. “Миллий тикланиш” демократик партияси фракцияси раҳбари Алишер Қодиров бунга жавоб қайтарди.
Унинг сўзларига кўра, 1922 йилда Советлар қурултойи орқали тузилган СССРни фақат шу қурултой тарқатиши мумкин эди. 1991 йилдаги тарқатиш жараёнида эса бу тартиб бузилган.
“Агар қонуний тартиб бузилган бўлса, конституциявий ҳуқуқ мутахассислари таъкидлаганидек, СССР юридик жиҳатдан мавжуд бўлиб чиқади”, деган эди Антон Кобяков.
Кобяков СССР тарқатилиши ҳақидаги “Беловежск келишуви” ҳақида ҳам тўхталиб, бу келишувни кейинчалик РСФСР, USSР ва БССР Олий Кенгашлари тасдиқлаганини, лекин бу умуман уларнинг ваколатига кирмаганини қайд этиб, “ҳуқуқий нуқтайи назардан ғалати ҳолат”, деб атаган. Шунингдек, агар СССР ҳали ҳам мавжуд бўлса, мантиқан, ҳуқуқий нуқтайи назардан қаралганда Украина инқирози бу ички жараён ҳисобланишини билдирган.
Олий Мажлис Қонунчилик палатаси депутати, “Миллий тикланиш” демократик партияси фракцияси раҳбари Алишер Қодиров бунга жавобан ўзбек халқи 1990 йилда қабул қилинган 1409-I сонли СССР қонунининг 2-моддасига мувофиқ СССРдан ажралиб чиқишга қарор қилганини ва ким истаса, истаганича муҳокама қилиши мумкинлигини, бу қарор тўғри ва ўзгармас эканлигини ўзининг Telegram каналида ёзиб қолдирди.
“Россия эса шамоллаганлар ва хаёлпарастларидан тезроқ қутулиши керак. Бу дард газак олиб, тобора оғир оқибатлардан дарак бермоқда. Украина эгоист, тарқоқ ва заиф Ғарбга таяниб хато қилди, лекин бир-бирига таянаётган Марказий Осиё, қолаверса, бутун туркий дунёни ҳисобга олмаганлар хато қилади”, дейди Алишер Қодиров.
Россия президенти Совет иттифоқи энди йўқлигини, ўтмишни қайтариб бўлмаслигини, қолаверса, Россияга энди бунинг кераги йўқлигини ўз баёнотларида таъкидлаб ўтган. Алишер Қодиров Владимир Путиннинг фикрини қўллаб-қувватлаши, қалбан рус дунёсига тааллуқли бўлганлар ҳудуди етарлича кўп бўлган Россияда хотиржам ва бахтли яшашлари кераклигини билдирди.
Изоҳ (0)