Россия президенти маслаҳатчиси Антон Кобяков Совет Иттифоқи “юридик жиҳатдан ҳали ҳам мавжуд” эканини маълум қилди. У Петербург халқаро юридик форумида шундай баёнот берди.
Кобяковга кўра, бундай фикрни “конституциявий ҳуқуқ бўйича мутахассислар”, жумладан, хорижий экспертлар ҳам анчадан бери билдирмоқда.
Улар нега бундай дейишмоқда? Улар СССРни тарқатиб юбориш тартиби бузилгани сабабли шундай гапирмоқда. Агар 1922 йилда Халқ депутатлари съезди, яъни Советлар съезди СССРни ташкил этган бўлса, уни тарқатиш ҳам ўша депутатлар съездининг қарори билан амалга оширилиши керак эди, деди Путин маслаҳатчиси.
Шунингдек, у 1991 йил 8 декабрда имзоланган Беловеж битимларининг ҳуқуқий асосланганини шубҳа остига олди.
Кейинчалик бу ҳужжатларни РСФСР, Украина ССР ва БССР Олий Советлари ратификация қилган, лекин бу уларнинг ваколатига кирмайди, дея таъкидлади у.
Кобяков ўзининг ҳуқуқий мантиғига асосланиб, Россиянинг Украинага ҳарбий босқинини “ички жараён” деб атади. У “замонавий воқеаларни тушуниш учун СССРнинг парчаланишига тегишли ҳуқуқий баҳо бериш кераклигини” билдирди.
СССР гўёки мавжудлигини давом эттираётгани ҳақидаги ғоя конспирологик доираларда узоқ вақтдан бери айланиб келмоқда. 2000 йилларнинг бошида ушбу ғоя атрофида бир нечта ҳаракатлар шаклланди, уларнинг аъзолари ўзларини “СССР фуқаролари” деб атади.
Улар, жумладан, Россия ҳужжатларини тан олишдан, ҳарбий хизматни ўташдан ва коммунал хизматлар учун тўловларни амалга оширишдан бош тортди. 2022 йилда Россия Адлия вазирлиги “СССР фуқаролари” ҳаракатини экстремистик деб эълон қилди ва уни тегишли рўйхатга киритди. Шу йили ҳаракат раҳбари Сергей Тараскин экстремистик ташкилот тузгани учун 8 йил озодликдан маҳрум этилишга ҳукм қилинди.
Владимир Путин илгари ҳам бир неча бор Совет Иттифоқининг парчаланишидан афсусланганини билдирган эди. Хусусан, у бу воқеани “ХХ асрнинг энг катта геосиёсий ҳалокати” деб таърифлаган.
Изоҳ (0)