Калифорния штатининг Сан-Диэго шаҳрида Cessna самолётининг турар жой мавзесига қулаши оқибатида бир неча киши вафот этди. Бу ҳақда ABC News телеканалининг маҳаллий бўлинмаси хабар бермоқда.
Уларнинг маълумотларига кўра, барча қурбонлар самолёт ичида бўлган. Ерда бўлган одамлар орасида жабрланганлар йўқ. Аниқ қанча киши ҳалок бўлгани ҳақидаги маълумот ҳозирча келтирилмаган.
BBC News’нинг хабар қилишича, самолётда учувчи билан бирга 8-10 киши бўлган бўлиши мумкин. Дастлабки маълумотларга кўра, зарар кўрган 15 та уйда яшовчиларнинг ҳеч бири жиддий жароҳат олмаган. Тахминан 100 киши хавфсиз жойга кўчирилган. Ушбу ҳудуддаги биттадан ташқари барча ёнғинлар бартараф этилган.
Агентлик маълумотларига кўра, самолёт яқин атрофда жойлашган Монтгомери-Филд аэропортига йўл олган.
“Ҳодиса жойида авиация ёқилғиси тўкилган. Бизнинг асосий вазифамиз — барча уйларни текшириш ва одамларни хавфсиз жойга олиб чиқиш”, дейди маҳаллий ўт ўчирувчилар вакили Ден Эддин. У самолёт “бир нечта уйга зарар етказганини” таъкидлаган.
Қайд этилишича, воқеа содир бўлган пайтда Сан-Диэгода жуда қалин туман бўлган.
АҚШда самолётлар иштирокидаги сўнгги авиаҳодисалар:
5 январь Аляска яриморолида АҚШнинг F-35А қирувчи самолёти қулаб тушди. Учувчи катапульта қилишга улгурди ва тирик қолди.
30 январь куни эрталаб American Airlines йўловчи самолёти Вашингтон аэропорти яқинида ҳарбий вертолёт билан тўқнашди, сўнгра Потомак дарёсига қулади. Оқибатда ҳеч ким омон қолмади, 5 февраль куни авиаҳалокатда ҳалок бўлган барча 67 кишининг жасади Вашингтондаги дарёдан олиб чиқилди.
1 февраль куни АҚШнинг Филаделфия шаҳрида авиаҳалокат юз берди: тез тиббий ёрдам самолёти турар жой ҳудудига қулаб тушди, уйлар ва автомобилларга зарар етди.
7 февраль куни бортида 10 киши бўлган самолёт Аляскада ғойиб бўлди
11 февралда эса Аризонадаги аэропортда иккита самолёт тўқнашиб кетди. Фавқулодда вазият оқибатида бир киши ҳалок бўлди, яна уч киши жароҳат олди.
12 февралда АҚШ ҳарбий-денгиз кучларининг самолёти Сан Диэго кўрфазига қулаб тушди. Авиаҳалокат Норт Айленд ҳарбий авиабазаси яқинида юз берган. Самолёт бортида икки киши бўлган. Уларни балиқ овлаш кемаси қутқариб қолган.
19 февраль АҚШнинг Аризона штати осмонида 19 февраль куни кичик самолётлар тўқнашди, оқибатда икки киши ҳалок бўлди. Ҳар бир самолёт бортида иккитадан одам бўлган. Тўқнашув Тусон шаҳри яқинида содир бўлган. Тўқнашувдан сўнг Cessna 172 самолёти хавфсиз қўнишга муваффақ бўлган. Бироқ Lancair 360 МК II учиш-қўниш йўлаги яқинида ерга қулаб, ёниб кетган.
25 февраль Американинг Southwest Airlines авиакомпаниясининг йўловчи самолёти Чикагодаги Мидуэй халқаро аэропортига қўниш чоғида хусусий самолёт билан тўқнашишига бир бахя қолди. Йўловчи самолёти сўнгги дақиқада ҳавога кўтарилишга мажбур бўлган.
Нью Йорк штатида 10 апрель куни авиаҳалокат юз берди. Вертолёт Гудзон дарёсига қулаб тушиши оқибатида 6 киши ҳалок бўлди.
Изоҳ (0)