AQSHning Arizona shtati Skotsdeyl aeroportida 11-fevral kuni samolyotlar ishtirokidagi navbatdagi aviahalokat sodir bo‘ldi. Hodisa oqibatida kamida bir kishi halok bo‘ldi. Bu haqda ABC News xabar berdi.
Bombardier Learjet samolyoti aeroportga qo‘nganidan so‘ng uchish-qo‘nish yo‘lagidan chiqib ketgan. U xususiy hududda to‘xtab turgan Gulfstream 2100 biznes-jetiga borib urilgan. Hodisa oqibatida uch kishi jarohat olib, shifoxonaga yotqizilgan, bir kishi esa davolanishdan bosh torgan. Samolyotlardan birida bir kishi qamalib qolgan.
Ayni paytda uchish-qo‘nish yo‘lagi yopiq. Aviahodisa payti Gulfstream bortida yo‘lovchilar bo‘lmagani ma’lum qilingan.
“Gulfstream bortida jarohatlanganlar yo‘q, biroq samolyotga tashqi zarar yetgan. Biz aeroport ma’muriyati va tegishli idoralar bilan to‘liq hamkorlik qilmoqdamiz, chunki ular vaziyatni chuqur o‘rganmoqda”, deyiladi xabarda.
30-yanvarga o‘tar kechasi American Airlines aviakompaniyasining samolyoti halokatga uchradi. U Vashingtondagi Ronald Reygan aeroportiga qo‘nish vaqtida harbiy vertolyot bilan to‘qnashib ketgan. Layner bortida 64 yo‘lovchi bo‘lgan, ular orasida AQSH chempionatidan qaytayotgan figurali uchuvchilar ham bor edi. Vertolyotda uch nafar harbiy xizmatchi bo‘lgan. Hech kim tirik qolmadi.
Izoh (0)