AQSH harbiy-dengiz kuchlarining samolyoti 12-fevral kuni San-Diego ko‘rfaziga qulab tushdi. Bu haqda Fox News xabar berdi.
Aviahalokat Nort-Aylend harbiy aviabazasi yaqinida yuz bergan. Samolyot bortida ikki kishi bo‘lgan. Ularni baliq ovlash kemasi qutqarib qolgan. Hozirda uchuvchilar kasalxonada. Ularni H&M Landing baliq ovlash kompaniyasi vakillari qutqargan va samolyotda “mexanik nosozlik” kuzatilganini aytgan.
Taxminan soat 10:15 atrofida ikkala uchuvchi samolyotlaridan mexanik nosozlik tufayli katapult qilindi. Bir necha soniyadan so‘ng samolyot ko‘rfazga qulab tushdi. Yaqin atrofda bo‘lgan Premier kemasi tezda vaziyatga javob berdi, deyiladi kompaniya xabarida.
Harbiy-dengiz kuchlari vakiliga ko‘ra, aviahalokatdan oldin avariya signali yuborilgani hozircha aniq emas. Samolyot qoldiqlari suvda qolmoqda.
AQSHda yuz bergan so‘nggi aviahalokatlar:
25-yanvar Alyaska yarim orolida AQSHning F-35A qiruvchi samolyoti qulab tushdi. Uchuvchi katapulta qilishga ulgurdi va tirik qoldi.
30-yanvar kuni ertalab American Airlines yo‘lovchi samolyoti Vashington aeroporti yaqinida harbiy vertolyot bilan to‘qnashdin, so‘ngra Potomak daryosiga quladi. Oqibatda hech kim omon qolmadi, 5-fevral kuni aviahalokatda halok bo‘lgan barcha 67 kishining jasadi Vashingtondagi daryodan olib chiqildi.
1-fevral kuni AQSHning Filadelfiya shahrida aviahalokat yuz berdi: tez tibbiy yordam samolyoti turar-joy hududiga qulab tushdi, uylar va avtomobillarga zarar yetdi.
7-fevral kuni bortida 10 kishi bo‘lgan samolyot Alyaskada g‘oyib bo‘ldi.
11-fevralda esa Arizonadagi aeroportda ikkita samolyot to‘qnashib ketdi. Favqulodda vaziyat oqibatida bir kishi halok bo‘ldi, yana uch kishi jarohat oldi.
Izoh (0)