Microsoft ўзининг 50 йиллик юбилейи маросими чоғида компаниянинг Исроил билан сунъий интеллект соҳасидаги ҳамкорлигига норозилик билдирган икки ходимини ишдан бўшатди. Бу ҳақда Al Arabiya хабар берди.
Компаниянинг айтишича, ходимлардан бири тадбирни “атайлаб издан чиқаришга уринган” бўлса, иккинчиси эса ишдан кетиш ниятида бўлган. Аммо белгиланган санадан беш кун олдин компания билан алоқалари узилган. Норозиликлар 4 апрель куни Microsoft’нинг Редмонддаги кампусида ўтказилган юбилей тадбирида бошланган.
Абоуссад исмли ходима Microsoft’нинг сунъий интеллектдан (СИ) эзгулик йўлида фойдаланиш ҳақидаги даъволарини танқид қилган:
Сиз сунъий интеллектни эзгулик учун ишлатмоқчисиз, лекин Microsoft бу технологияни Исроил ҳарбийларига етказмоқда. 50 минг киши ҳалок бўлди, Microsoft эса бу геноцидни қувватлаяпти, деди у СИ бўйича бош директор Мустафо Сулейманга қарата.
У саҳнага Фаластин халқига бирдамлик рамзи бўлган куфия рўмолини улоқтирган, хавфсизлик ходимлари эса уни олиб чиқиб кетган. Сулейман эса норозиликка тинч оҳангда муносабат билдириб, “Раҳмат, сизни эшитдим”, деган.
Кейинчалик яна бир Microsoft ходими Вания Агравал ҳам тадбир давомида эътироз билдирган. У 11 апрель куни ишдан кетиши керак эди, бироқ менежер уни вақтлироқ ишдан бўшатган.
Абоуссад эса 7 апрель куни суҳбатга чақирилиб, иш жойидан дарҳол бўшатилгани ҳақида хабардор қилинган. Microsoft унга йўллаган хатда норозиликни ички тартибда билдириш мумкинлиги айтилган ва унинг очиқ чиқиши “агрессив ва ноўрин” деб баҳоланган.
СИ технологияларининг ҳарбий мақсадларда қўллабгани бўйича терговлар
Терговга кўра, Microsoft ва OpenAI’нинг сунъий интеллект моделлари Ғазо ва Ливандаги урушларда Исроил армияси томонидан бомбардимон нишонларини аниқлашда қўлланилган. Жумладан, 2023 йилда Ливанда хато йўлга қўйилган ҳужум оқибатида уч қизалоқ ва бувиси ҳалок бўлгани маълум қилинган.
Бу Microsoft’даги илк норозилик эмас. Февраль ойида ҳам компания ходимлари Исроил билан шартномаларни танқид қилиб, CEO Сатя Наделла билан учрашувдан чиқариб юборилган эди.
Microsoft баёнотида шундай дейилади:
“Ходимларимиз фикрини билдириш учун имкониятлар бор. Аммо бу компания фаолиятига халақит бермаслиги лозим. Агар бу талаб бузилса, ходимлардан жойини ўзгартириш сўралади. Биз фаолиятимизда энг юқори стандартларга амал қиламиз”.
2024 йил Google компаниясида ҳам шунга ўхшаш норозиликлар кузатилган. Project Nimbus лойиҳаси доирасида Исроилга СИ технологиялари етказилиши сабабли НьюЙорк ва Калифорния офисларида намойишлар бўлиб ўтган, натижада ўнлаб ходимлар ишдан бўшатилган. Google ходимлари бу бўйича АҚШ Меҳнат муносабатлари миллий кенгашига шикоят аризаси топширган.
Изоҳ (0)