Барселонадаги Глобал Саломатлик Институти (ISGlobal) олимлари ўтказган тадқиқотга кўра, келажакда Арктика музларининг эриши оқибатида мамлакатлар об-ҳавоси кескин ўзгариши мумкин. Ўтган ўн йилликда бунинг таъсирида кўплаб мамлакатларда кучли ёмғирлар ва аномал иссиқ об-ҳаво кузатилди. Бу ҳақда “ISGlobal” хабар берди.
Тадқиқот шуни кўрсатадики, Арктика музларининг эриши АҚШ жануби-ғарби, Калифорния штатининг иқлими қуруқроқ бўлишига олиб келган. Бу ҳодиса айниқса, қиш мавсумида яққол сезилмоқда. Шунингдек, бу жараён Испания ва Португалия иқлимига ҳам таъсир кўрсатиб, қишда намлик даражасининг ошишига сабаб бўлмоқда.
Денгиз музларининг эриши нафақат Арктикага яқин ҳудудлар, балки анча узоқ мамлакатлар иқлимининг ўзгаришига ҳам сабаб бўлмоқда.
Бундан ташқари, Арктиканинг тез исиши об-ҳавони бошқарадиган кучли шамоллар оқимини заифлаштириб қўймоқда. Бу оқим жанубий ҳудудларда совуқ ҳаво массалари ва шимолий минтақаларда иссиқлик тўлқинлари каби кескин об-ҳаво ҳодисаларига йўл очиб бермоқда. Мисол учун, Арктика исиши билан боғлиқ қутб гирдоб тизимининг заифлашуви 2021 йилда Техасдаги музлаш ва 2017 йилдаги “Ҳарви довули” пайтидаги кучли сув тошқинлари каби ҳодисаларга сабаб бўлди.
Канадада музларнинг эриши оқибатида кўплаб ҳайвон ва ўсимлик турлари хавф остида қолмоқда. Музлар эриши, шунингдек, ҳудуддаги денгиз йўллари ва ресурслар билан боғлиқ иқтисодий масалалар ва транспорт тизимларига таъсир кўрсатган.
Гренландияда ҳам музларнинг эриши ҳам катта ташвишларга сабаб бўляпти. Бу жараён нафақат экологик муаммоларни келтириб чиқаради, балки глобал денгиз сатҳининг кўтарилишига ҳам сабаб бўлади.
Изоҳ (0)