Анъанавий архитектура меъёрларига тўғри келмайдиган, ғайриоддий шакл ва тузилмаларга эга уйларни дунёнинг турли чеккасидан топиш мумкин. Уларни қуришдан мақсад — дизайнерларнинг ижодкорлик ва табиат билан уйғунликни ифодалашга интилиши ҳамда кўпроқ инсонларни жалб қилишдир. Қуйида ана шундай ноёб кўринишга эга бир нечта уйлар архитектураси билан танишамиз.
Ғудда-уй. Калифорния, АҚШ
Дарахтда қурилган мазкур уй қарағай ғуддасини эслатадиган ноодатий архитектураси билан танилган. У Калифорниядаги ўрмонларда жойлашган. Архитектор Дастин Файдер томонидан ишлаб чиқилган мазкур уй ердан 18 метр баландликда жойлашган. Унинг барча томонидан Ред Вуд ўрмонининг гўзал манзарасини томоша қилиш мумкин.
Шиша пол, шифт ва деворлар ўрмон ўртасида левитация каби сеҳрли муҳитни яратади. Уйнинг ўлчами кичик бўлишига қарамай, ичида дам олиш жойи ва ақлли ҳаммом мавжуд. Уйнинг бир кунлик ижара пули ўртача 240 АҚШ долларини ташкил этади. Ғудда-уй табиат қўйнида ва тинчликда вақт ўтказишни истаганлар учун идеал вариантдир.
Кубик-рубик уйлар мажмуи. Роттердам, Нидерландия
Кубик-рубик уйлар Роттердамнинг энг машҳур сайёҳлик марказларидан бири бўлиб, ҳар йили минглаб хорижликларни ўзига жалб қилади. Улар 1970 йилларда машҳур голланд меъмори Пит Блом томонидан лойиҳалаштирилган. Объектларнинг ҳар бири 45 градус бурчак остида бўлиб, тасодифий тарзда жойлаштирилган улкан кубик-рубикларни эслатади.
Уйларнинг ички қисми уч қаватдан иборат: ётоқхоналар юқори қаватларда, меҳмонхона ва ошхона қуйида жойлашган. Ўзининг ғайриоддий ташқи кўринишига қарамай, тўлақонликяшаш учун мўлжалланган уйлар ҳисобланади. Битта квартира нархи 275 минг долларга баҳоланган.
Пуфак-сарой. Лион, Франция
Франциялик мода дизайнери ўзидан кейин ноёб архитектура намунасини қолдирди. Футуризм ва авангард намунаси бўлган қабариқ уй 1991 йилда моделер Пьер Карденнинг мулкига айланди. У венгриялик архитектор Антти Ловага томонидан ишлаб чиқилган. Турар жой Канн яқинида, Ўрта Ер денгизи соҳилидаги қояда жойлашган.
Архитектор ғоясига кўра, уй ибтидоий одамларнинг ғорларига ўхшатиб қурилган. Уй қопламаси пуркаладиган бетондан қилинган ва поғонали томлардан пастга — ҳовузга тушилади. Бинонинг том қисмида амфитеатр бор, уйнинг ўзи эса 10 та ётоқхонадан иборат. Бино 1200 квадрат метр майдонни эгаллайди ва унинг атрофидаги майдон 8500 квадрат метрни ташкил қилади. Унинг нархи 360 миллион долларга баҳоланган.
Ғор-уй. Мехико, Мексика
Мексиканинг Наукалпан де Хуарес шаҳрида жойлашган ноёб архитектура иншооти 1984 йилда меъмор Хавьер Сеносиайн томонидан қурилган. Унинг кўриниши қуёнлар инига ўхшаб кетади.
174 квадрат метр майдон барча томондан тупроқ ва ям-яшиллик билан қопланган. Шу туфайли шамол ва ёмғирдан ҳимояланган. Улкан панорама деразалар эса қуёш нурларининг ҳеч қандай муаммосиз кириб боришига имкон беради.
Замонавий ва минималистик дизайнга эга уйнинг ичи кенг ва шинамдир. Унда ётоқхона, ошхона ҳамда меҳмонхонасига эга. Мазкур уй футуристик услубни ҳамда ёлғизликда қолишни ёқтирадиганлар учун айни муддаодир.
Изоҳ (0)