Биткоин нархи 22 май куни тарихда биринчи марта Binance криптобиржасида 111 минг доллардан ошди. Бу ҳақда CNBC хабар берди.
Тошкент вақти билан соат 08:45 да криптовалюта 111 880 доллардан сотилди, кейинроқ курс бир оз пасайди. Биткоиннинг 21 май кунги қиймати илк бор 109,5 минг долларга етганди. АҚШ президенти Дональд Трампнинг апрель ойида кенг кўламли савдо божларини жорий этиш ҳақидаги баёноти фонд индексларида пасайишга сабаб бўлганди. Натижада биткоин курси 75 минг доллардан пастлаганди. Бироқ божларини жорий этишдаги пауза сабабли криптовалютанинг қиймати яна кўтарила бошлади.
Биткоин нархи ошишига АҚШда инфляция даражаси пасайиши, АҚШ ва Хитой ўртасидаги савдо уруши юмшаши, ва Moodyʼs рейтинг агентлиги томонидан АҚШ давлат қарзи баҳосининг туширилиши сабаб бўлди, дейди Nexo криптобиржаси асосчиларидан бири Антони Тренчев.
У АҚШ ва Хитой ўртасидаги кенгроқ савдо келишуви устида музокаралар олиб борилаётгани сабабли, таваккалчиликка асосланган активлар учун уч ойлик “имкониятлар ойнаси” очилганини таъкидлади.
Биткоиннинг ҳозирги бозор капиталлашуви тахминан 2,18 триллион долларни ташкил этади. Бу Tesla, Amazon, Alphabet ва дунёдаги энг қиммат учта компания: Microsoft, Apple ва Nvidia’дан ташқари бошқа кўплаб компанияларнинг капиталлашувидан ҳам юқоридир.
Изоҳ (1)
ha ancha yaxsh ku