Бир фанга бўлган муҳаббат ва тиришқоқлик ортидан шарқ-у ғарбнинг нуфузли билим даргоҳларини забт этиш мумкинми? Албатта, мумкин. Халқаро даражадаги иқтисодчи-молиячи, қатор илмий изланишлар муаллифи, кўплаб йирик ташкилотларда иш тажрибасига эга таҳлилчи Иброҳимжон Абдуллаев ўз мисолида буни исботлади.
Ҳозирда АҚШнинг Линкольн университетида Бизнес бошқаруви (DBА) бўйича докторантура таҳсилини олаётган Иброҳимжон Абдуллаев 1995 йили Андижон вилоятининг Марҳамат туманида туғилган. Мактабда математика устозининг фанни содда ва равон тушунтириши ҳамда аниқликка бўлган қизиқиш бу соҳани айрича меҳр билан ўрганишга туртки бўлди. Тиришқоқлик, изланиш, мактаб ва туман миқёсидаги олимпиадаларда иштирок ва қарабсизки, 2014 йилда математика бўйича республика олимпиадасида 1-ўрин.
Иброҳимжон шу нуқтадан бошланган билим ва муваффақият сари йўли ҳақида “Дарё”га ҳикоя қилиб берди.
Ҳам масъулият, ҳам имконият
Математикага бўлган қизиқиш, рақамлар мўжизаси бу фан билан жиддий шуғулланишимга сабаб бўлган. Бу қизиқиш амалий натижа бера бошлаганида эса келажагимни ҳам математика билан боғлашга қарор қилдим. Республика олимпиадасидаги ғалаба каттароқ муваффақиятларга ундади, ўзимга ишончимни оширди, масъулият юклади.
Чет элда таҳсил олиш имкониятларни каррасига оширишини билган ҳолда, хорижий олийгоҳ талабаси бўлишни мақсад қилдим. Тинимсиз ўқиш-изланиш, пухта тайёрлов натижаси ўлароқ 2015 йилда Жанубий Кореянинг Сеул шаҳридаги Сежонг университетининг Бизнес бошқаруви йўналиши бакалавр босқичига қабул қилиндим. 2019 йилда университетда ўтказилган “Энг яхши молиячи” танловида 1-ўринни қўлга киритдим.
Илм истаб уммон ортига
Бакалавриатдан кейин АҚШнинг нуфузли таълим даргоҳларида ҳам билим олсам, деган фикр ўй-хаёлимни банд қилди. Карантин даврида бу орзу қатъий мақсадга айланди ва тайёрланишга киришдим. 2021 йилда Калифорния штати Окленд шаҳридаги Линкольн университетининг Молиявий бошқарув (MBA) йўналишида магистратура босқичига қабул қилиндим. Ҳозирда Бизнес бошқаруви (DBА) дастури бўйича докторантура таҳсилини ҳам шу университетда давом эттиряпман.
Таҳсил баробарида халқаро молиявий хавфлар, кредит рисклари ва барқарор иқтисодий модел таҳлиллари бўйича тадқиқот олиб боряпман. Бундан ташқари, илмий фаолиятим давомида халқаро миқёсда эътироф этилган International Journal of Finance&Banking Studies, Journal of Emerging Financial Markets, Global Economics Review каби нуфузли журналларда 10 дан ортиқ мақолам чоп этилди. Шунингдек, Рискларни бошқариш бўйича профессионаллар глобал ассоциация (GARP) ва Халқаро молиявий менежмент ассоциацияси (FМА) каби йирик ташкилотларга аъзо бўлдим, бундай муҳит профессионализмни такомиллаштиришимда муҳим рол ўйнайди.
Миллий ва халқаро тажриба
Илк иш тажрибам Ўзбекистонда бошланган – Миллий банкда амалиёт ўтаганман. Кредит портфелини таҳлил қилиш, мижозлар кредитини баҳолаш ва рисклар тўғрисида ҳисобот тайёрлаш, макроиқтисодий тадқиқотлар ўтказиш, аудит, шунингдек, кичик ва ўрта тадбиркорлик субъектлари учун молиявий моделлар яратиш бўйича ўзимни синаб кўрдим.
2020 – 2021 йилларда Сеулдаги Vroong компаниясида фаолият юритдим. Дастлаб молиявий таҳлилчи, сўнг рекрутинг менежери сифатида ишлаб, йирик хорижий ташкилотда масъулиятли вазифада ишлашнинг таъмини тотдим. Компаниянинг минтақавий кенгайишида кадрлар режалаштирувини стратегик жиҳатдан бошқариш жараёнида соҳам бўйича амалий кўникмаларим такомиллашиб борди, молия ва инсон капитали ўртасидаги боғлиқликни чуқурроқ тушундим.
Кейинчалик Ўзбекистон Республикаси Кадастр вазирлигида бюджетни режалаштириш бўйича маслаҳатчи сифатида ҳам ишладим. Давлат бюджетини таҳлил қилиш, ресурслар тақсимоти самарадорлигини ошириш ҳамда фискал стратегияларни шакллантириш жараёнида иштирок менга тенгсиз амалий тажриба берди.
Лидерларга кўмак
Фаолиятим давомида фақат молия-иқтисод соҳаси билан чекланиб қолмасликка ҳаракат қилганман. Ўзим қачонлардир босиб ўтган йўл – нуфузли хорижий олийгоҳлар талабаси бўлишда янги авлодга тўғри йўл-йўриқ кўрсатиш истаги амалга кўчди – 2016 йилда Leader Аcаdemy номли таълим агентлигига асос солдим.
Агентлик хорижий тилларни ўрганиш, SAT имтиҳонларига тайёрлов, халқаро университетларга ҳужжат топшириш борасида 2000 дан ортиқ ўқувчига ёрдам берди, 300дан ортиқ ўқувчининг АҚШ, Корея ва Европадаги нуфузли университетларга қабул қилинишига эришди. Агентликни бошқариш давомида 20дан зиёд консултант ва инструкторлардан иборат жамоани бошқариш мен учун янги тажриба бўлди. 4 йил давомида барқарор ўсишни қайд этган бизнесимни 2020 йилда шахсий режаларим сабабли сотишимга тўғри келди.
Улкан мақсадлар, эзгу мақсадлар
Мақсадлар катта, шижоат зўр, тўхтаб қолиш йўқ. Салоҳият ва кўникмаларимни мунтазам такомиллаштириб бориш, илм-фанга асосланган ёндашувлар орқали глобал молия тизимини ривожлантиришга ҳисса қўшишни ўзимнинг бош мақсадим деб биламан. Буни амалга ошириш учун докторантурани тамомлагач фаолиятимни нуфузли халқаро молия институтларида давом эттиришни режалаштиряпман.
Қолаверса, келгусида фақат ўз мутахассислигим билан чекланиб қолмоқчи эмасман. Ёшлар турли йўналишларда билим олишлари мумкин бўлган очиқ таълим платформаларини йўлга қўйиш ниятим бор. Бу бўйича университетдаги илмий раҳбарим билан биргаликда ҳаракатларни бошлаганмиз. Токи ўқийман деган ҳар бир ёш йигит-қиз ўзига керакли билимни сифатли ва тартибли ола билсин, ҳаракатларини мақсадли йўналтира олсин, илмий менторга эга бўлсин. Бу халқаро даражадаги мутахассисларни тайёрлаш йўлида муҳим восита ўлароқ хизмат қилади, деб ўйлайман.
Саидазиз Аъзамов суҳбатлашди
Изоҳ (0)