Ноқонуний йўл билан ҳажга борганлар Саудиядан депортация қилинади

Дин ишлари бўйича қўмита фуқароларга мурожаат билан чиқиб, ноқонуний йўллар билан ҳажга бориш оқибатларини эслатди.

Саудия Арабистони Ҳаж ва умра вазирлигидан келиб тушган хабарномага кўра, рухсатномасиз ҳаж амалларини бажаришга ҳаракат қилиш тегишли тартибда жавобгарликка тортилади. Шунингдек, бу борада Саудия Ички ишлар вазирлигининг махсус баёноти ҳам илова қилинган. Белгиланган тартибга мувофиқ ҳаж амалларини бажариш учун зиёратчида “Ҳаж-2025” визаси бўлиши шарт. Саудия Арабистони ҳукумати қолган барча турдаги визалар — умра, туризм, бизнес, зиёрат ва бошқалар билан ҳаж тадбирини амалга оширишга қатъий йўл қўймайди.

“Тушунтириш ва огоҳлантиришларга қарамай, ҳозирда айрим турфирмалар ва учинчи давлатлар орқали фуқароларимизни ҳаж зиёратига жўнатишга ҳаракатлар кузатилмоқда”, дейилади қўмита хабарида.

Саудия ҳуқуқ тартибот идоралари томонидан амалга оширилаётган рейдлар натижасида ноқонуний равишда ҳаж ибодатини амалга оширишга уринган шахсларга нисбатан жазо чоралари қўлланилади ва мамлакатдан депорт қилинади.

Хусусан, ноқонуний йўллар билан ҳаж амалларини бажариш 20 мингдан 100 минг саудия риёлигача  (27 минг АҚШ долларигача) молиявий жарималар қўлланишига сабаб бўлади. Шунингдек, фуқарони Саудиядан депортация қилишдан ташқари кейинги 10 йил давомида подшоҳликка кириши тақиқланганлар рўйхатига киритилиши белгиланган.

Ўзбекистонда ҳаж тадбири Вазирлар Маҳкамасининг 2017 йил 7 июндаги “Ҳаж ва умра тадбирларини ташкил этиш ва ўтказишни янада такомиллаштириш чора-тадбирлари тўғрисида”ги қарори асосида ўтказилади.

Шунга кўра, ҳаж тадбири Дин ишлари бўйича қўмита ва Саудия Арабистони подшоҳлиги Ҳаж ва умра вазирлиги ўртасида ҳар йили имзоланадиган шартнома асосида Ўзбекистон мусулмонлари идораси томонидан амалга оширилади ҳамда бундай фаолият билан бошқа ташкилотларнинг шуғулланишига йўл қўйилмайди.

“Шундай экан, юртдошларимизни турли алдов йўллари билан ҳажга олиб боришни ваъда қилаётган фирибгарларга ишонмасликка чақирамиз. Огоҳ бўлинг, фирибгарларга алданманг”, дейилади қўмита хабарида.

“Ҳаж-2025” мавсуми ҳақида 

Ўзбекистонда 13—28 май кунлари зиёратчилар 9 та ҳудуд — Тошкент, Бухоро, Наманган, Самарқанд, Қарши, Термиз, Урганч, Навоий ва Нукус шаҳарларидаги аэропортлар орқали Мадина шаҳрига кузатилади. Улар учун Мадина шаҳрида муҳташам Zam-zam Pullman меҳмонхонаси, Маккада Marmara hotel, Romance hotel, Al-Ayyam elite, Concrete hotel, Abroj Dania, Paradise, Open hotel ва Ayyed saha каби 8 та меҳмонхонада барча шарт-шароитлар яратилиб, ҳожиларни юқори савияда кутиб олишга шай қилинди. “Ҳаж – 2025” мавсумида ҳожиларга 14 нафар мингбоши, 303 нафар элликбоши хизмат қилади. Шунингдек, ишчи гуруҳи, шифокорлар ва ошпазлар жалб қилинган.

Ҳаж нархи

2019 йилда Ўзбекистонда бир кишининг ҳажга бориб келиши 33,3 млн сўмни (ўша пайтдаги курс бўйича 3879 доллар) ташкил этган. Пандемиядан сўнг 2022 йилга келиб ҳаж зиёрати нархи кескин (деярли икки баравар) ошган ва бир кишилик тўлов 62 миллион 900 минг сўм этиб белгиланди. Ўшанда Мусулмонлар идораси нарх қимматлашишига Саудия ҳукумати ҳаж сафарига доир қўшимча солиқ ва мажбурий тўловлар жорий этгани, транспорт ҳамда бошқа қатор хизматлар қиймати кескин ошганини сабаб қилиб кўрсатган эди. Шундан сўнг ҳам нархлар ошишда давом этди — 2023 йилда 68 миллион 760 минг сўм, 2024 йилда эса 73 миллион 970 минг сўмни ташкил этган. Ўзбекистонлик зиёратчилар 2025 йилги ҳаж мавсуми учун 78 миллион 670 минг тўлайди.

Ҳаж учун тўланган маблағ ичига нималар киради?

• ҳаж визаси;
• авиабилет (Мадинайи мунавварага тўғридан тўғри авиарейс);
• Zam-zam Pullman, Kraun Plaza (Мадина шаҳрида) ҳамда Аброж ал-Ҳидоя (Макка шаҳрида) меҳмонхоналарида яшаш;
• шаҳарлараро (Мадина—Макка—Жидда) транспорт хизмати;
• ҳожиларнинг тиббий суғуртаси;
• 3 маҳал иссиқ овқат: нонушта, тушлик ва кечки овқат;
• Мадинадаги Уҳуд тоғи, Қубо ва икки қиблали масжидларга зиёрат;
• Маккадаги Мино, Арофат ва Муздалифа водийларидаги барча хизматлар;
• 24/7 режимидаги тиббий хизмат;
• 24/7 режимидаги транспорт хизмати;
• қурбонлик;
• замзам суви (5 литр);
• республиканинг 7 та ҳудудидан кузатиш ва кутиб олиш;
• давлат рамзлари туширилган нимча ва сумка;
• ҳаж қўлланмаси.

Ўзбекистонда ҳаж квотаси сўнгги йилларда 3 баробарга оширилган

Ўзбекистонликлар учун ҳаж квотаси сўнгги йилларда 3 баробарга оширилган бўлиб, ҳар йили 15 минг нафар ўзбекистонликлар ҳожи бўлмоқда, 2024 йилги ҳаж мавсумида Ўзбекистонда 15 150 нафар зиёратчи ҳаж амалини бажарган. 

2025 йилда Ўзбекистондан 15 259 нафар фуқаро ҳажга боради. Бу йил энг кўп зиёратчилар Тошкентдан боради — 22 та рейсда 5607 нафар йўловчи. Намангандан 20 та, Самарқанддан 4 та, Бухоро ва Қаршидан 2 та, Термиздан 4 та, Урганч ва Навоийдан 2 та, Нукусдан 1 та рейс учади.